![](https://youthfoundation.az/wp-content/uploads/2017/12/sirli-azerbaycan.jpg)
Azərbaycan Respublikasının Prezidenti yanında Gənclər Fondunun maliyyə dəstəyi ilə “Gənclərin Maariflənməsinə Dəstək” İctimai Birliyi tərəfindən “Sirli Azərbaycan” layihəsi həyata keçiriləcək. Layihənin əsas məqsədi gənclərin asudə vaxtını daha səmərəli keçirməsinə şərait yaratmaq, onların dünyagörüşünü artırmaqdır.
Layihə çərçivəsində Bakı, Gəncə, Şəki şəhərlərində silsilə tədbirlər həyata keçirilib. Yüzlərlə gəncin iştirakı ilə keçirilən tədbirlərdə layihə haqqında məlumatlar verilib, gənclərin sualları cavablandırılıb. Tədbirlərdə fəallığı ilə seçilən gənclər layihənin Şəki şəhərində keçiriləcək sonuncu mərhələsində iştirak etməyə haqq qazanıblar.
Seçilən gənclərdən ibarət gənclərin iştirakı ilə 23-24 dekabr 2017-ci il tarixlərində Şəki şəhərində layihənin sonuncu mərhələsi baş tutacaq. İntellektual oyunda gənclər Sirli sualların cavablarını digər komandalardan daha tez taparaq qalibiyyət şanslarını artıracaqlar. Oyunun Sirrini ən tez aça bilən və bütün mərhələləri uğurla tamamlayan komanda qalib elan olunacaq. Qaliblər sertifikat və medallar ilə mükafatlandırılacaqlar.
Lahiyə çərçivəsində keçiriləcək oyunun məqsədi komandaların növbəti mərhələyə keçməsini təmin edən “açarların” axtarışıdır. Hər komanda 5-6 nəfərdən ibarət olmaqla təşkil olunur. Oyunçular məntiqi tapmacanın (sualın, tənliyin və s.) “açar”-larını tapdıqdan sonra növbəti mərhələyə keçmək imkanı əldə edirlər. Beləliklə hər mərhələdən sonra yeni mərhələ gəlir. Tapmacanın açarları və ya hər hansı bir cavabı oyun keçirilən meydançanın hər yerində gizlədilə bilər.
Qeyd edək ki, “Gənclərin Maarifləndirilməsinə Dəstək” İctimai Birliyi bu tip tədbirlərin keçirilməsində böyük təcrübəyə malikdir. “Sirli Azərbaycan” İntellektual yarışı Azərbaycan Respublikasının Prezidenti yanında Gənclər Fondunun maliyyə dəstəyi ilə keçirilən ikinci “Code Tusi” formatlı yarışdır.