18 noyabr 2017-ci ildə Qusar rayonu Heydər Əliyev mərkəzində Azərbaycan Respublikasının Prezidenti yanında Gənclər Fondunun maliyyə, Qusar rayon Gənclər və İdman İdarəsinin təşkilati dəstəyi ilə “Sumqayıt Tələbələri” ictimai birliyi tərəfindən “Region gənclərinin turizmin inkişafında rolunun artırılması” layihəsi çərçivəsində növbəti təlim keçirilib.
Tədbiri giriş sözü ilə açan “Sumqayıt tələbələri” İctimai Birliyinin sədri Rüfət Mahmudzadə iştirakçılara layihənin məqsədləri – mövcud yerli turistik imkanların dəyərləndirilməsi, daxili turizmin inkişafında gənclərin rolunun artırılması və yerli gənc turizm menecerlərinin bilik və bacarıqlarının inkişaf etdirilməsi barədə məlumat verdi.
Qusar rayon Gənclər və İdman Baş İdarəsinin rəis müavini Ramin Məcidov çıxışında rayonda turizmin inkişafı sahəsində aparılan məqsədyönlü işlər barədə danışdı. R. Məcidov təməli 2009-cu ilin sentyabrında Ölkə Prezidenti cənab İlham Əliyevin iştirakı ilə qoyulmuş və Azərbaycan tarixində ilk dağ-xizək kurortu olan “Şahdağ” Qış-Yay Turizm İstirahət Kompleksinin Qusar rayonunda yerləşməsinin regionda geniş turizm patensialının olmasını vurğuladı.
Təlim turizm, təhsil və İKT sahəsində ekspert və təlimçi Ramil Süleymanov tərəfindən keçirilib. Təlim zamanı Qusar rayonunun turizm üzrə biznes imkanları, startaplar, rayonun daxili və xarici turizm ehtiyatları barədə müzakirələr aparılıb, gənclərin turizmlə bağlı ideyaları öyrənilib və təlimçi tərəfindən bu ideyaların həyata keçirilməsi yollarından danışılıb.
Layihə çərçivəsində yekun təlimin Quba rayonunda təşkil olunması nəzərdə tutulub.
