Azərbaycan Respublikasının Prezidenti yanında Gənclər Fondunun maliyyə dəstəyi və “ASAN Könüllüləri” Təşkilatının təşkilati dəstəyi ilə “Sağlamlıq Günü: ASAN Könüllülərinin III Spartakiadası” layihəsi həyata keçiriləcək.
Gənclər Fondunun X qrant müsabiqəsinin qalibi Mahir Hətəmovun layihə rəhbəri olduğu “ASAN Könüllülərinin III spartakiadası”nın əsas məqsədi ölkənin milli idman strategiyasının dəstəklənməsi, gənclər arasında idmanın təbliği ilə sağlam nəslin formalaşdırılmasına töhfə verməkdir.
Qəbələ şəhərində baş tutacaq layihədə 7 fərqli bölgədən olan gənc iştirakçılar müxtəlif idman növləri üzrə fərdi və komandalar şəklində mübarizə aparacaqlar.
İştirakçılar voleybol, tennis, kəndirdartma, qaçış və digər idman növləri üzrə öz güclərini sınayacaqlar.
Tədbirin sonunda ümumi idman növləri  üzrə ən çox xal qazanaraq I, II, III yerləri tutmuş komanda üzvləri medallarla təltif olunacaq. Spartakiadanın növbəti kuboku I yeri tutmuş komandaya təhvil veriləcək.