Azərbaycanda elmin inkişafına xidmət etmək məqsədilə layihələr təşkil edən Azərbaycan Elm Assosiasiyası ən böyük layihəsini həyata keçirmişdir. Azərbaycan Respublikasının Prezidenti yanında Gənclər Fondunun Azərbaycan Elm Assosiasiyası həmsədri İnqilab Şahbazova ayırdığı qrant dəstəyi ilə təşkil edilən “Multidissiplinar Elmi Forum” dahi alim Lutfi Zadəyə həsr edilmişdir.
Multidissiplinar Elmi Forum çərçivəsində humanitar və dəqiq elmlər üzrə 12 seminarda ekspert təqdimatları baş tutmuşdur. Tanınmış ekspertlər və xaricdə təhsil almış gənc mütəxəssislərin, eləcə də, Assosiasiyanın həmsədrləri İnqilab Şahbazov, Tərlan Süleymanov və müavini Mədinə Quliyevanın təqdimatları böyük auditoriya tərəfindən izlənilmişdir. İdarə heyətinin bir digər üzvü Fidan Bəylərova isə könüllülər komandası rəhbəri olaraq təşkilatçı qismində çalışmışdır.
Forum çərçivəsində seminarlarla yanaşı UProject poster müsabiqəsi də təşkil edilmişdir. Olduqca böyük maraqla izlənən poster müsabiqəsində elmin müxtəlif sahələrindən aktual məsələlər tələbələr tərəfindən poster şəklində təqdim edilmişdir. Sonda isə ən yaxşı üç posterin sahibi dəyərli mükafatlarla təltif olunmuşdur.
Multidissiplinar Elmi Forumun hər il keçirilməsi planlaşdırılır.