“Bakı Gənclər Klubu” ictimai birliyi dövlət siyasətimizin vacib tərkib hissələrindən biri olan gənclərimizin vətənpərvər ruhda tərbiyəsini əsas tutaraq, Azərbaycan Respublikasının Prezidenti yanında Gənclər Fondunun dəstəyi ilə 20 sentyabr 2017-ci il tarixindən “Vətən səninlə öyünür, qəhrəman!” adlı layihəsinin icrasına başlayır. Layihə Bakı şəhəri və respublikamızın cənub bölgəsi – Biləsuvar, Cəlilabad, Masallı və Lənkəran rayonlarında həyata keçiriləcək.
Layihənin məqsədi – gəncləri Qarabağ müharibəsi zamanı döyüşçülərimizin göstərdiyi şücaət və qəhrəmanlıq anları ilə tanış edərək, onlarda hərbi vətənpərvərlik ruhunu yüksəltməkdir.
Layihənin hazırlıq mərhələsində cəlb olunacaq ekspertlərin iştirakı ilə Bakı Dövlət Universitetinin “Tarix” və “Beynəlxalq Münasibətlər və İqtisadiyyat” fakültəsinin tələbələrini layihəyə cəlb etmək məqsədilə təqdimat keçiriləcək. Həmçinin, tanınmış tarixçi, Bakı Dövlət Universitetinin Tarix fakültəsinin dosenti, I Qarabağ müharibəsi iştirakçısı – Atamoğlan Məmmədli tərəfindən keçiriləcək təlimlərdə I Qarabağ müharibəsinin səbəbləri, başlanması və gedişatı, igid döyüşçülərimizin həyata keçirdiyi əməliyyatlar, işğal olunmuş rayonlar və bu işğalın acı nəticələri, və s. haqqında məlumatlar veriləcək. Təlimlərlə yanaşı, döyüşçülər və şəhid ailələri ilə görüşlər keçiriləcək, yeni məlumatların əldə edilməsi üçün Biləsuvar, Cəlilabad, Masallı, Lənkəran rayonlarına səfərlər təşkil olunacaq. Sonda təşkilatımız tərəfindən layihənin nəticəsi olaraq qeyd etdiyimiz rayonların birində yerləşən hərbi hissədə yekun tədbirin keçirilməsi, Qarabağ müharibəsi zamanı həyata keçirilən əməliyyatlar, döyüşlərlə bağlı nəşrlərin çapı və gənclər arasında paylanması nəzərdə tutulub.  Layihə 20 gəncin iştirakı ilə 3 ay davam edəcək.