Azərbaycan Respublikasının Prezidenti yanında Gənclər Fondunun fəaliyyətinin 5 illiyinə həsr olunmuş tədbirlər davam edir. 13 Dekabr 2016-cı il tarixində Lənkəran şəhər Heydər Əliyev Mərkəzində keçirilən tədbirdə şəhər rəhbərliyi, Gənclər Fondunun rəsmiləri həmçinin Masallı, Yardımlı, Lerik, Cəlilabad və Biləsuvar rayonlarının gənclər və idman idarələrinin, gənclər təşkilatlarının təmsilçiləri iştirak ediblər.
Tədbiri açan Lənkəran Şəhər İcra Hakimiyyətinin başçısının müavini Rəsilə Əliyeva Gənclər Fondunun gənclərə çox böyük dəstək verdiyini, onların ideyalarını və təşəbbüslərini reallaşdırmağa şərait yaratdığını bildirmişdir.
Azərbaycan Respublikasının Prezidenti yanında Gənclər Fondunun aparat rəhbəri Faiq Qürbətov Gənclər Fondunun ötən beş ildəki fəaliyyəti, qazandığı uğurlar, əldə olunan nailiyyətlər barədə danışıb, Fondun beş illik fəaliyyətinə həsr olunan təqdimatı nümayiş edib. Diqqətə çatdırılıb ki, fəaliyyətə başladığı gündən indiyədək Gənclər Fonduna 7098 layihə daxil olub, onlardan 3341-i dəstəklənib. Eyni zamanda, səfər qrantları ilə bağlı 384 müraciətin 167-nə müsbət cavab verilib. Bildirildi ki, Lənkəran şəhəri üzrə 201, Masallı rayonu üzrə 85, Yardımlı rayonu üzrə 28, Lerik rayonu üzrə 45, Cəlilabad rayonu üzrə 51 və Biləsuvar rayonu üzrə 51 layihə dəstəklənib.
Tədbirdə Lənkəran şəhər Gənclər və İdman İdarəsinin rəisi Yalçın Əhmədov iştirak etmiş və regionlarda fəaliyyət göstərən gənclərin layihələrinin reallaşmasına göstərdiyi dəstəyə görə Gənclər Fondunun rəhbərliyinə minnətdarlıqlarını bildirmişdir.
