“Bakı Gənclər Klubu” İctimai Birliyi Azərbaycan Respublikasının Prezidenti yanında Gənclər Fondunun maliyyə dəstəyi ilə “Biz onlardan öyrəndik – qəhrəmanlığı!” adlı layihənin icrasını başa çatdırmışdır.
Layihənin məqsədi – gənclər arasında qəhrəmanlıq nümunələrini təbliğ etmək, vətənpərvərlik ruhunun yüksəlməsi istiqamətində və vətəndaşlıq tərbiyəsi sahəsində aparılan işlərin səmərəsini artırmaq, həmçinin, I Qarabağ müharibəsi zamanı torpaqlarımızın müdafiəsi zamanı şücaət göstərmiş qəhrəman döyüşçülərimizi gənclərimizə tanıtmaqdan ibarət idi.
Layihə çərçivəsində təlimlərdə gənclərə I Qarabağ müharibəsinin başlama səbəbləri, gedişatı, döyüşlərin, həyata keçirilən əməliyyatlar, həmçinin, işğal olunmuş rayonlar və bu işğalın nəticələri, yeni faktlar və s. haqqında məlumatlar verilmişdir. Həmçinin, döyüşçülər və şəhid ailələri ilə görüşlərin keçirilməsi üçün Füzuli, Ağdam, Tərtər, Xocavənd, Beyləqan rayonlarına səfərlər təşkil olunmuşdur. Səfərlər zamanı əldə edilən məlumatlar öz əksini layihə çərçivəsində çap edilmiş nəşrlərdə tapmış və gənclər, döyüşçülər arasında paylanmışdır.
Bu səfərlərin və layihənin yekunu olaraq Füzuli, digər atraf rayonları Qarabağ veteranlarının, yerli ictimaiyyətin, gənclərin iştirakı ilə Füzuli Muğam evində layihənin yekun tədbiri həyata keçirilmişdir. Tədbirdə iştirak edən Füzuli rayon Gənclər və İdman idarəsi rəisi Eldəniz Səfərəliyev açılış nitqində qonaqları Füzuli Rayon İcra Hakimiyyəti adından salamlamış, keçirilən görüşün mahiyyəti haqqında qısa məlumat vermiş və layihənin Füzuli rayonunda keçirilməsində göstərdikləri təşəbbüsə görə “Bakı Gənclər Klubu” İctimai Birliyinin rəhbərliyinə öz minnətdarlığını bildirmişdir.
“Bakı Gənclər Klubu” İctimai Birliyinin sədri Azər Cavadov öz çıxışı zamanı tədbirin həyata keçirilməsi üçün yaradılmış şəraitə görə yerli İcra Hakimiyyətinə və layihəni dəstəklədiyinə gorə Azərbaycan Respublikasının Prezidenti yanında Gənclər Fonduna öz minnətdarlığını bildirmiş və tədbir iştirakçılarına layihə çərçivəsində görülən işlər haqqında məlumat vermişdir. Ekspert – təlimçi Atamoğlan Məmmədli Azərbaycan döyüşçülərinin I Qarabağ müharibəsi zamanı keçdikləri döyüş yolları və göstərdikləri igidliklər haqqında danışmışdır. Sonra I Qarabağ müharibəsi döyüşçüləri iştirak etdikləri əməliyyatlar, döyüşlər haqqında geniş məlumat vermiş və bir çox faktları gənclərlərlə bölüşmüşdürlər.
