“Bakı Gənclər Klubu” İctimai Birliyi Azərbaycan Respublikasının Prezidenti yanında Gənclər Fondunun maliyyə dəstəyi ilə 10 may 2016-cı il tarixindən “Biz onlardan öyrəndik – qəhrəmanlığı” adlı layihəsinin icrasına başlayır. Layihə respublikamızın cənub-qərb bölgəsi – Füzuli, Ağdam, Tərtər, Xocavənd və Goranboy rayonlarında həyata keçiriləcək.
Layihənin məqsədi – qəhrəmanlıq nümunələrini gənclər arasında təbliğ etmək, vətənpərvərlik ruhunun yüksəlməsi istiqamətində və vətəndaşlıq tərbiyəsi sahəsində aparılan işlərin səmərəsini artırmaq, həmçinin, I Qarabağ müharibəsi zamanı torpaqlarımızın qorunmasında şücaət göstərmiş qəhrəman döyüşçülərimizi gənclərimizə tanıtmaqdan ibarətdir.
Layihənin hazırlıq mərhələsi bitdikdən sonra, layihəyə cəlb olunacaq ekspertlərin iştirakı ilə ali təhsil ocaqlarında tələbələrlə görüşlər keçiriləcək. Həmçinin, təlimçimiz – tarixçi – Bakı Dövlət Universitetinin Tarix fakültəsinin dosenti, I Qarabağ müharibə iştirakçısı – Atamoğlan Məmmədli tərəfindən I Qarabağ müharibəsinin səbəbləri, başlanması və gedişatı, igid döyüşçülərimiz, həyata keçirilən əməliyyatlar, işğal olunmuş rayonlar və bu işğalın acı nəticələri, yeni faktlar və s. haqqında məlumatlar keçiriləcək təlimlərdə veriləcək. Təlimlərlə yanaşı, döyüşçülər və şəhid ailələri ilə görüşlərin keçirilməsi, yeni məlumatları əldə etməsi üçün Füzuli, Ağdam, Tərtər, Xocavənd, Goranboy rayonlarına səfərlər təşkil olunacaq və sonda qeyd etdiyimiz rayonların birində təşkilatımız tərəfindən layihənin nəticəsinə həsr olunmuş yekun tədbir keçiriləcək.
Layihə ali təhsil ocaqları tələbələrinin iştirakı ilə 3 ay davam edəcək.