Azərbaycan Respublikasının Prezidenti yanında Gənclər Fondunun maliyyə dəstəyi ilə həyata keçirilən “Gənc teatr – gənclər üçün teatr” adlı layihə yekunlaşdırılıb. Layihənin əsas məqsədi gəncləri Azərbaycan teatr tarixi ilə yaxından tanış etməkdən ibarətdir. Layihə məqsədinə çatmaq üçün qoyulan vəzifələr isə teatrımızın yaxın və uzaq keçmişini, tanınmış xalq artistlərini, görkəmli aktyor və sənətkarlarımızı, eləcədə incəsənət xadimlərimizin teatr həyatındakı əvəzsiz rollarını iştirakçılara tanıtmaq, region gəncləri arasında teatr sənətinə olan maraq dairəsini genişləndirmək, mümkün qədər daha çox gəncin bu sahəyə marağını  artırmaqdan ibarətdir.
Layihə rəhbəri İkram Aslanovun bildirdiyinə görə Qazax rayonunda həyata keçirilən layihə çərçivəsində bir neçə seminar keçirilmişdir ki, rayon gənclərinin də bu seminarlara yüksək marağı müşahidə olunmuşdur. Azərbaycanın sənət mərkəzlərindən biri olan Qazax rayonunda belə bir layihənin gerçəkləşməsi zamanı iştirakçılar bu tip layihələrin ölkəmizin digər regionlarında da həyata keçirilməsinin önəmini vurğulamışlar.
İkram Aslanov bildirmişdir ki, gələcəkdə layihə nəticələrini nəzərə alaraq layihənin daha geniş şəkildə davam etdirilməsi qərara alınmışdır. Bunun üçün müxtəlif dövlət və biznes qurumları ilə əməkdaşlıq ediləcəkdir.