Azərbyacan Respublikasının Prezidenti yanında Gənclər Fondunun maliyyə dəstəyi, “Gənclərin təhsil, təlim, peşə və inkişaf mərkəzi” ictimai birliyinin təşkilatçılığı, “Events Boutique”, JA1 və Metropark AVM-nin təşkilatı dəstəyi ilə 6-cı qrant layihəsi çərçivəsində “Küçə teatrı və incəsənəti festivalı” adlı layihə həyata keçirilib.
Çoxsaylı gənclərin diqqətini cəlb edən festivalın məqsədi yaradıcı gənclərin dəstəklənməsi, küçə teatrının və incəsənətin təbliği, yeni formatda tədbirlərin və gənclərin asudə vaxtının səmərəli təşkili, gənclərin yeni peşələrə yiyələnməsinin təmin edilməsi və inkişafda olan yeni incəsənət növlərinə marağın oyadılması olub.
Qeyd edək ki, qoyulan məqsədlərə nail olmaq üçün müsabiqə elan edilmiş, müəyyən olunmuş istiqamətlərə uyğun olaraq anketlər toplanmışdır. Müsabiqə aktyorluq sənəti, musiqi sənəti, rəqs və rəssamlıq istiqamətləri üzrə elan edilmişdir.
Qeyd edək ki, müsabiqədə iştirak üçün 100 nəfərdən çox fərdi şəxslər, 15-ə yaxın kollektiv müraciət edib. Daha sonra münsiflər heyəti tərəfindən seçim aparılaraq 35-ə yaxın iştirakçının yekun tədbirlərdə çıxışı barədə qərar verilib.
Metropark AVM-də təşkil olunan tədbirlərdə pantomim, stendup və küçə aktyorları, portretçilər, karikaturaçılar, xınaçı rəssamlar, face art ustaları, təlxəklər, rəqqaslar və digərləri iştirak ediblər. Tədbir vaxtı gənclər öz bacarıq və istedadlarını nümayiş etdirməklə tamaşaçılar tərəfindən maraqla qarşılanıblar.
Tədbirdə Azərbyacan Respublikasının Prezidenti yanında Gənclər Fondunun fəaliyyəti, Azərbaycan gəncliyi dövlət proqramı, Azərbaycan gənclərinin inkişaf strategiyası, gənclər siyasətinin prioritet istiqamətləri barədə məlumat verilib.
Sonda bir sıra gənc şəhadətnamə və təşəkkürnamələrlə təltif olunublar.
