09 – 11 fevral tarixlərində Azərbaycan Respublikasının Prezidenti yanında Gənclər Fondunun maliyyə dəstəyi ilə Bakı Slavyan Universitetində “WikiTəlim” layihəsi həyata keçirilib.
Layihənin ikinci günündə “Hajızade Group” şirkətinin direktoru Əli Hacızadə gənclərə Wikipedia ilə bağlı təlim keçib. İnteraktiv qaydada davam edən zəngin təlim prosesində gənclərə wikipediyadan istifadə, yeni məqalələrin yaradılması, məqalələrinin dərininliyinin artırılması, wikipediyada Azərbaycan maraqları və bütün dünyada wikipediyası haqqda məlumat verilib.
Layihənin üçüncü günü isə Azərbaycan Respublikası Milli Məclisinin deputatı, Azərbaycan dilli wikipediyanın zənginləşdirilməsində müstəsna rolu olan Aydın Mirzəzadənin gənclərlə görüşü baş tutub. Görüş zamanı Azərbaycan dövlət maraqlarından həmçinin erməni lobbisinin fəaliyətindən danışan Aydın Mirzəzadə, layihə iştirakçılarına Wikipedia ilə bağlı qarşıda duran hədəflərdən danışaraq, təcrübələrini bölüşüb. Böyük maraqla qarşılanan görüş iki saat davam edib, daha sonra layihənin yekunları müzakirə olunub, gəncləri maraqlandıran suallara cavab verilib və sertifikatların təqdim olunması mərasimi ilə layihə yekunlaşıb.
Qeyd edək ki, “WikiTəlim” layihəsinin qarşısında duran vəzifələr Wikipedianın Azərbaycan dilində zənginləşdirilməsi prosesinə xidmət etmək, Azərbaycan həqiqətlərini dünyaya çatdırmaq, gənclərin bu prosesdə iştirakını genişləndirmək və erməni diasporasının anti azərbaycançı addımlarının qarşısını almaqdır.
