Azərbaycan Respublikasının Prezidenti yanında Gənclər Fondunun maliyyə dəstəyi ilə “Könüllünün uğur hekayəsi” layihəsinə start verilir.
Layihənin əsas məqsədi könüllülük hərəkatının təbliğatını aparmaqla gəncləri könüllü olmağa həvəsləndirmək, könüllü gənclərin fəaliyyətini stimullaşdırmaq və onların öz uğurlu könüllülük təcrübəsini digər gənclərlə paylaşmalarına şərait yaratmaqdır.
Qeyd edək ki, layihə müsabiqə şəkilində həyata keçiriləcək. Layihədə iştirak edərək öz könüllü hekayəsini ictimaiyyətlə paylaşmaq istəyən gənclər “Könüllünün uğur hekayəsi” başlığı altında yazdıqları hekayələri [email protected] ünvanına göndərə bilərlər.
Layihə rəhbəri İlhamə Qasımzadənin sözlərinə görə gənclər tərəfindən göndərilən 10 ən yaxşı hekayə kitab şəkilində çap olunub ictimaiyyətə təqdim olunacaq. Həmçinin, layihə çərçivəsində gənclərin könüllü fəaliyyətə həvəsləndirilməsi, o cümlədən onların yerli və beynəlxalq könüllülük proqramları haqqında məlumatlandırılması üçün “Könüllü ol!” seminarı keçiriləcək. Layihənin sonunda qalib gənclər mükafatlandırılacaq.