Azərbaycan Respublikasının Prezidenti yanında Gənclər Fondunun maliyyə dəstəyi və Bakı Beynəlxalq Multikulturalizm Mərkəzinin, Azərbaycan Respublikası Mədəniyyət və Turizm Nazirliyinin, Azərbaycan Milli İncəsənət Muzeyinin təşkilatı dəstəyi ilə “Multikulturalizm və Tolerantlıq Diyarı Azərbaycan” layihəsinin icrasına başlanılıb. 2016-cı ilin ölkəmizdə “Multikulturalizm ili” elan olunması ilə təsdiq edilmiş “Tədbirlər Planı”na uyğun olaraq həyata keçirilən layihə Azərbaycanın görkəmli təsviri sənət ustalarının əsərlərindən ibarət sərgini geniş ictimaiyyətə təqdim edəcəkdir. Azərbaycan Milli İncəsənət Muzeyində keçiriləcək sərgidə Azərbaycan sənətkarlarının xalqlar dostluğunu tərənnüm edən və özündə multikultural və tolerant dəyərləri ehtiva edən əsərləri nümayiş olunacaqdır. Eyni zamanada “Azərbaycan təsviri sənətində multikultural və tolerant dəyərlər” mövzusunda dəyirmi masa və sərgi kataloqunun təqdimatı keçiriləcəkdir.
Layihənin məqsədi Azərbaycanda olan mültikultural və tolerant mühitin daha uzun illəri əhatə etdiyini və bugün də uğurla davam etdirildiyini təsvirlərlə geniş ictimaiyyətə çatdırılması, Azərbaycanın multikulturalizm modelinin dünya ölkələrinə nümunə kimi təqdimatı, gənclərə multikulturalizm dəyərlərinin aşılanması və tolerantlığın əhəmiyyətinin təbliğ olunmasıdır.
