Azərbaycan Respublikasının Prezidenti yanında Gənclər Fondunun 7-ci qrant müsabiqəsində qalib olan “Voleybol – bizimlə sağlam ol!” layihəsinin icrasına start verilmişdir. Layihə rəhbəri Biləsuvar rayonunun aktiv gənclərindən biri olan Sənan Mənsimli layihə barədə öz sözlərində bildirdi ki, voleybol qaydaları barədə Azərbaycan dilində ədəbiyyatın və internet resursunun çox az olması; bu oyunun Biləsuvar rayonunda geniş yayılmasına baxmayaraq, nə oyunçuların, nə də yerli hakimlərin voleybol qaydalarının detallı şəkildə məlumatsızlığı; hal-hazırda Azərbaycanda keçirilən voleybol yarışlarında Biləsuvardan komandasının olmaması kimi amillər bir daha sübut edir ki, bu idman növünün bölgələrdə geniş təbliğinə ehtiyac vardır. Bildiyimiz kimi Azərbaycanın voleybol üzrə qadınlardan ibarət yığma komandası və bir sıra paytaxt voleybol klubları ölkədən kənarda az vaxtda yüksək nailiyyətlər əldə etmişlər. Lakin yığma və klub voleyboçularımızın çoxu legionerlərdən ibarətdir. İstər yığmamızda, istərsə də klublarımızda milli voleybolçularımızın sayının artırılması yöndə işlər aparılmalıdır. Fikrimcə bu işi məhz qlobal şəkildə aparmaqla – regionlarda voleybola uşaqkən maraq yaratmaqla az da olsa bu problemi aradan qaldırmış olarıq.
Layihə rəhbəri onu da qeyd etdi ki, layihənin əsas məqsədlərdən biri də bu idman növünün qaydalarını gənclər arasında maarifləndirmək və bu sahədə ədəbiyyatın formalaşdırmaqdır. Voleybol oyun qaydaları haqda kitabça tərtib edərək – çap etməklə, az da olsa bölgədə voleybol oyun qaydalarının təbliğinə nail olacağıq. Bununla yanaşı, layihə çərçivəsində təşkil olunacaq voleybol üzrə məktəblərarası rayon birinciliyi sayəsində Biləsuvar gənclərinin asudə vaxtlarının sağlam-səmərəli keçirilməsi üçün də yardımçı olacaqdır. Həyata keçiriləcək layihə gələcəkdə bölgə olaraq Biləsuvar voleybol komandasının da Azərbaycan Voleybol Çempionatlarında iştirak etməsinə stimul verəcəkdir.