Azərbaycan-Slavyan Gəncləri Assosiasiyası (ASGA) Azərbaycan Respublikasının Prezidenti yanında Gənclər Fondunun maliyyə dəstəyi ilə “Aprel döyüşlərinin tank komandiri: Şəhidliyin Rəhim Tağıyev zirvəsi” – adlı qısametrajlı sənədli film çəkir. “ARB24”-ün texniki dəstəyi ilə reallaşan layihənin əsas məqsədi ötən ilin aprel döyüşlərində qəhrəmancasına şəhid olan Rəhim Tağıyevlə bağlı sənədli film çəkərən onu gənclər arasında təbliğ etməkdən ibarətdir.
Layihənin rəhbəri, ASGA sədri Səbuhi Abbasov bildirib: “Biz aprel döyüşlərində igid əsgərlərimizin  şücaətini paytaxt və region gəncləri arasında təbliğ etməyi qarşıya əsas hədəf kimi qoymuşuq. Bu mənada “Aprel döyüşlərinin tank komandiri: Şəhidliyin Rəhim Tağıyev zirvəsi” sənədli filmin çəkilişində şəhidin ailə üzvləri ilə yanaşı hərbçi dostlarının da iştirakını vacib bildik. Bizə göstərdikləri diqqət və qayğıdan dolayı Müdafiə Nazirliyinə dərin təşəkkürümü bildirirəm. Biz ASGA olaraq aprel döyüşlərində qəhrəmancasına şəhid olan hər bir əsgərimizin cəmiyyətdə tanıdılmasının tərəfdarıyıq. Bu mənada təklif etdiyimiz layihə Fondun bütün komissiya üzvləri tərəfindən müsbət qarşılandı. Mən bir daha Gənclər Fonduna və ARB24 rəhbərliyinə öz təşəkkürümü bildirirəm”.
Məlumat üçün qeyd edək ki, bu ASGA-nın efir üçün hazırladığı sayca 3-cü peşəkar sənədli filmdir.