19 dekabr 2016-cı il tarixində, saat 16:00-da Beynəlxalq Mətbuat Mərkəzində Azərbaycan Respublikasının Prezidenti yanında Gənclər Fondunun maliyyə dəstəyi ilə VIII qrant müsabiqəsinin qalibi olan gənc musiqiçi Günay Sadıxovanın “Kitablar və Mən” layihəsinə qatılan iştirakçıların mükafatlandırılma mərasimi keçiriləcəkdir.
Qeyd edək ki, layihənin əsas məqsədi gəncləri maarifləndirmək, dünya görüşünü, intellektlərini zənginləşdirmək, kitab oxucularının sayını artırmaq, gənclərə yazmaq bacarığını əxz etdirməkdir. Layihənin adından məlum olduğu kimi “Kitablar və mən” kəlməsində “mən” adlı fərdin kitablara olan münasibətini, sevgisini, rəğbətini bu layihədə üzə çıxarmaq, aşılamaq əsas məqsədlərdəndir.
Layihənin əsas şərti isə hər hansı bir əsər və ya kitab haqqında alınan təəssüratların yazılı şəklində – inşa, esse, məqalə formasında iştirakçılar tərəfindən təqdim olunmalı idi.
“Kitablar və mən” layhəsinə 50-yə yaxın məqalə təqdim edilmişdir. I mərhələdə 50 yazıdan ən yaxşı 10 yazı seçilmiş, II mərhələdə isə 10 yazı arasında ən maraqlı yazı nümunələrinin qalibləri I-II-III yerlər üzrə ekspertlər tərəfindən müəyyən edilmişdir. Layihənin ekspertləri filologiya üzrə fəlsəfə doktoru, ədəbiyyatşünas Firudun Qurbansoy və Milli Elmlər Akademiyasının Nizami adına Ədəbiyyat İnstitutunun aparıcı elmi işçisi, filologiya üzrə fəlsəfə doktoru, dosent Bəsirə Əzizəliyevadır.
Qaliblərin mükafatlandırılma mərasiminə hər bir kəs qatıla bilər. Giriş sərbəstdir.
