Azərbaycan Respublikasının Prezidenti yanında Gənclər Fondunun elan etdiyi VIII qrant müsabiqəsinin C kateqoriyası üzrə qalibi Şıxıyev Vasif Vaqif oğlu tərəfindən fondun dəstəyi ilə Şamaxı rayonunun məktəbliləri arasında reallaşdırılan “Gənc nəsil – Yeni intellekt” layihəsi uğurla davam etdirilir. Layihə üzrə növbəti təlim və intellektual oyunlar 29 noyabr və 1 dekabr 2016-cı il tarixlərində keçirilmişdir.
29 noyabr tarixində Şamaxı şəhər 3 saylı tam orta məktəbin “MÜBARİZ” komandası ilə rayonun Sabir qəsəbə tam orta məktəbinin “GÜLÜSTAN” komandası arasında keçirilən ilk oyunda “Mübariz” komandası öz rəqibinə qalib gələrək layihə üzrə iştirakını davam edrmişdir. 1 dekabr tarixində isə Şamaxı şəhər 1 saylı və 10 saylı tam orta məkəblərin komandaları arasında keçirilən intellektual oyunda isə şəhər 10 saylı tam orta məktəbin “BUTA” komandası da qalib gələrək layihə üzrə iştirakını davam etdirmişdir. İştirakçı şagirdlərə sertifikatlar təqdim olunmuşdur. Layihə üzrə növbəti intellektual oyunlar Şamaxı şəhərindəki Avropa və THT liseyinin şagirdləri arasında keçiriləcəkdir.
Qeyd edək ki, “Gənc nəsil – Yeni intellekt” layihəsinin keçirilməsində əsas məqsəd müxtəlif tipli intellektual oyunlar vasitəsilə gənclərimizə Azərbaycanın zəngin tarixini, mədəniyyətini, dahi şəxsiyyətləri tanıtmaqdan ibarətdir. Məqsədlər sırasına həmçinin bölgəmizdəki intellektual gəncləri ictimaiyyətə tanıtdırmaq, gənclərimizin intellektual səviyyəsini, dünyagörüşünü artırmaq, onların asudə vaxtlarını səmərəli təşkil etmək də daxildir. Layihə Yeni Azərbaycan Partiyası Şamaxı rayon Təşkilatı Gənclər Birliyinin, Şamaxı rayon Gənclər və İdman İdarəsinin və “BUTA” Gənclər İctimai Birliyinin təşkilati dəstəyi ilə icra olunur.
