Azərbaycan Respublikasının Prezidenti yanında Gənclər Fondunun maliyyə dəstəyi ilə “Sakit! Tamaşa gedir…” layihəsi həyata keçirilib.
Layihə rəhbəri Ayşəm Balayevanın verdiyi məlumata görə, layihə çərçivəsində eşitmə və nitq problemi olan gənclərə motivasiya, şəxsi inkişaf və teatr əsaslı psixoloji təlimlər keçirilmişdir. Təlimlərdə 1 saylı Sağlamlıq İmkanları Məhdud Gənclərin Peşə Reabilitasiya Mərkəzində peşə-reabilitasiyası keçən gənclər, Azərbaycan Karlar Cəmiyyəti İctimai Birliyinin üzvü olan gənclər iştirak etmişdir. Təlimlərdə fəal iştirak edən gənclər asudə vaxtlarını səmərəli keçirməklə yanaşı cəmiyyətə inteqrasiya, şəxsi inkişaf mövzularında bir çox bilik və bacarıq əldə etdilər.
Layihənin sonunda iştirakçılar Pantomima teatrında “AĞ BIĞLILAR” tamaşasını seyr etdilər.
Qeyd edək ki, “Sakit! tamaşa gedir…” layihəsinin məqsədi əlilliyi olan gənclərin asudə vaxtlarının daha səmərəli keçirilməsini təşkil etməklə onların cəmiyyətə inteqrasiyasını, aktiv həyat tərzi sürmələrini təmin etməkdir.