Azərbaycan Respublikasının Prezidenti yanında Gənclər Fondunun elan etdiyi VIII qrant müsabiqəsinin C kateqoriyası üzrə qalibi Kərimov Kərim Bəylər oğlu Fondun dəstəyi ilə “Gənc Robot Mühəndisləri” layihəsini uğurla davam etdirir. Layihə oktyabr ayı ərzində Bakı Ali Neft Məktəbində həyata keçirilir. Layihə çərçivəsində 5 təlim-seminar sessiyası həyata keçiriləcəkdir. Layihənin keçirilməsində əsas məqsəd Bakı şəhərində təhsil alan I və II kurs tələbələri arasından seçilmiş tələbələrdə roboto-texnika sahəsinə olan maraqlarının artırılması və praktiki məşğələlərlə komanda şəklində işləmək bacarıqlarının inkişaf etdirilməsidir.
Təlim-seminarlarda iştirak üçün 120 tələbə müraciət etmiş və müsahibə nəticəsində onlardan sadəcə 20 tələbə iştirak etmə hüququnu qazanmışdır.
Layihə açılışında Bakı Ali Neft Məktəbinin rektoru Elmar Qasımov, Prosseslərin Avtomatlaşdırılması kafedrasının baş müəllimi Manafaddin Namazov və NASA-nın keçmiş işçisi olmuş həmyerlimiz Dr. Teymur Sadıxov da iştirak etmişdir.
Təlim-seminarlar 5 həftə ərzində hər şənbə günü keçirilir. Son təlim günündə komandalar arasında robot yığmaq üzrə yarış keçiriləcəkdir və iştirakçılar hədiyyələr, sertifikatlar ilə mükafatlandırılacaqlar.
Layihədə iştirak etmiş tələbələr layihə daxilində tanış olduqları yeni yoldaşları ilə gələcəkdə bu sahədə öz fəaliyyətlərini davam etdirməyi və beynəlxalq yarışlarda ölkəmizi təmsil etməyi planlaşdırırlar.
Layihə rəhbəri, Kərim Kərimov: “Layihəyə olan marağın çoxluğunu nəzərə alaraq, təlimlərin gələcəkdə yenidən həvəskar tələbələr üçün əlçatan olmasını təmin etməyə çalışacağam.”