30 yanvar 2016-cı il tarixində Azərbaycan Respublikasının Prezidenti yanında Gənclər Fondunun 7-ci qrant müsabiqəsində qalib olan “Voleybol – bizimlə sağlam ol!” layihəsi çərçivəsində voleybol üzrə Biləsuvar rayon məktəblərarası birinciliyinə start verilmişdir.
Birinciliyin açılışında Biləsuvar İcra Hakimiyyəti İctimai-Siyasi və Humanitar məsələlər Şöbəsinin müdirinin müavini Kamil Qurbanlı və “Voleybol – bizimlə sağlam ol!” layihəsinin həyata keçirilməsində yaxından köməklik göstərən rayon Gənclər və İdman İdarəsinin rəisi Aqşin Bağırov iştirak etmişdir. Layihə rəhbəri Sənan Mənsimli və açılışda iştirak edən qonaqlar, bu cür layihələr rayon gənclərinin voleybol idman növünə maraqlarının artmasında, onların asudə vaxtlarının və sosial həyatının daha da səmərəli keçirilməsində böyük rol oynayacığı barədə danışmışlar.
Daha sonra layihə təşkilatçıları, qonaqlar və birincilikdə iştirak edən komanadaların oyunçuları tərəfindən Azərbaycan Respublikasının Dövlət Himni oxunaraq birincilik açıq elan olunmuşdur.
Birinciliyin ilk oyunları çox maraqlı və sağlam mübarizə şəklində həyata keçirilmişdir. İlk görüşün qalibləri növbəti mərhələyə adlamışlar. Onu da qeyd edək ki, sonda qalib olan iki ən güclü komandaya Azərbaycan Respublikasının Prezidenti yanında Gənclər Fondu dəstəyilə layihə çərçivəsində kubok, diplomlar və digər hədiyyələr təqdim olunacaqdır.