[imageeffect type=”frame” align=”alignleft” width=”240″ height=”154″ alt=”” url=”http://youthfoundation.az/wp-content/uploads/2013/10/Capture2.jpg” ]
İdeyası 2012-ci ilin fevral ayında ortaya çıxan və ilk pilot layihəsi 2013-cü ilin fevral-mart aylarında keçirilmiş Qladiator Debatları Azərbaycan, Türk dünyası və bütün Şərqin ilk milli debat formatıdır. Qladiator Debatları düşüncə və ritorika oyunu olub, cəmiyyət üçün vacib olan fərdi inkişafa istiqamətlənmişdir. Formatda ənənəvi olimpiada sistemindən imtina edilmiş və turnir yeni “Kolizey” sisteminə əsaslanmışdır. “Qladiator Natiqlik Məktəbi” layihəsi Qladiator Debatlarının Azərbaycan Respublikasının Prezidenti yanında Gənclər Fondunun III Qrant Müsabiqəsində qaliblərdən biri olaraq maliyyələşdirilən ilk layihəsidir.
Layihənin məqsədi Qladiator Debatları milli intellektual oyunu vasitəsilə gəncləri komanda şəklində fərdi inkişafa yönəldərək onlarda təqdimat, kritik düşüncə, bədən dili, natiqlik kimi bacarıqları təcrübi platformada inkişaf etdirməkdir.
Layihə 3 ay davam edəcək. İlk ay hazırlıq, elanların verilməsi, CV-lərin qəbulu və intervyu götürülməsi kimi 4 yarımmərhələdən ibarətdir. Layihənin növbəti ayının ilk həftəsi isə təlimlərə başlanılacaq. Təlimlər formatın konstruktoru, 7 illik debat təcrübəsinə malik Həbib Heydər, ritorika üzrə professional təlimçi Tofiq Sadıxov və Respublikanın güclü debatçılarından sayılan Elşən Yusibov tərəfindən keçiriləcəkdir. Növbəti 2 ayda həm də müxtəlif mövzularla bağlı ekspertlərlə görüşlər, fərdi inkişafla bağlı təlimlər və “Kolizey” adlandırılan QD turniri keçiriləcəkdir. Onu da qeyd edək ki, layihə müddətində iştirakçılar üçün əyləncə xarakterli tədbirlər də nəzərdə tutulur.
Layihədə Bakı və Sumqayıt şəhərlərindən 14-29 yaş arası subbakalavr, bakalavr, magistr təhsili alan, eləcə də ali təhsili olmayan şəxslər iştirak edə bilər. İştirakçılar layihədə debat və strategiya oyunlarının sintezini duyacaq, qlobal, geopolitik, fəlsəfi, mədəni, ekoloji mövzuların debat oyunlarında iştirak edəcəklər. Sonda qaliblər sertifikatlar və xüsusi hədiyyələrlə mükafatlandırılacaqlar. Qeyd edək ki, layihənin bütün bölümləri Azərbaycan dilində təşkil olunacaqdır.
Layihə Fəlsəfə Akademiyası, BMAM-Beynəlxalq Münasibətlərin Araşdırılması Mərkəzi, ÖZ Klub MMC ilə əməkdaşlıq edir və bir sıra media orqanları tərəfindən dəstəklənir.
Layihəyə təşkilati ofis dəstəyi 2006-cı ildən bəri fəaliyyət göstərən və ən qabaqcıl mütəxəssisləri cəlb etməyə nail olan MilliByte İTM tərəfindən verilir. Layihə ilə maraqlananlar İnşaatçılar m/s-ı, Şərifzadə 190 ünvanında yerləşən MilliByte ofisinə yaxınlaşa bilərlər.
Əlaqə üçün:
Qladiator Debatları rəsmi facebook səhifəsi: https://www.facebook.com/qladebator?fref=ts
Qladiator Debatları rəsmi facebook qrupu: https://www.facebook.com/groups/gladebator/?fref=ts
Layihə Direktorunun e-poçtu: [email protected]
