[imageeffect type=”frame” align=”alignleft” width=”240″ height=”154″ alt=”” url=”http://youthfoundation.az/wp-content/uploads/2013/10/bannerr_fond.jpg” ]
Azərbaycan Respublikasının Prezidenti yanında Gənclər Fondunun maliyyə dəstəyi ilə “Gənclərin Töhfəsi” İctimai Birliyi tərəfindən “Gənclər Ali baş Komandanın əmrinə hər an hazırdır!” devizi altında növbəti hərbi vətənpərvərlik düşərgəsi həyata keçiriləcəkdir. Layihənin keçirilməsində əsas məqsəd “Azərbaycan Gəncliyi 2011-2015-ci illərdə” Dövlət Proqramının müvafiq bəndlərinə uyğun olaraq gənclərlə vətənpərvərlik və vətəndaşlıq tərbiyəsi sahəsində aparılan işlərin səmərəsinin artırılması, gənclərin Azərbaycanın milli-mənəvi irsi və tarixi haqqında məlumatlandırılması, çağırışyaşlı gənclərin hərbi xidmətə həvəsləndirilməsi, elm, təhsil, mədəniyyət və digər sahələrdə fərqlənən istedadlı gənclərin stimullaşdırılması, asudə vaxtlarının səmərəli təşkilindən ibarətdir.
“Gənclərin Töhfəsi” İctimai Birliyinin sədri və layihə rəhbəri Asim Vəliyevin verdiyi məlumata görə, “Gənclər Ali Baş Komandanın əmrinə hər an hazırdır” devizi altında keçiriləcək hərbi vətənpərvərlik düşərgəsi layihəsi gəncliyə vətənpərvərlik ruhunun geniş təbliğatını, idman və fiziki təlimlər, hərbi-taktiki biliklərin öyrədilməsini, nizam-intizam qaydalarını, ordu və döyüş haqqında məlumatların verilməsini, gənclərin istirahətinin səmərəli keçirilməsini nəzərdə tutub və hərbi xidmətdə olmayan 18 yaşdan yuxarı gənclərə istiqamətlənib.
Layihə çərçivəsində keçiriləcək düşərgədə tarixi və vətənpərvərlik ruhunda filmlər nümayiş etdiriləcək, Azərbaycanın milli maraqları, ordu quruculuğu mövzusunda məruzələr ediləcək, müxtəlif səpgili yarışlar, idman oyunları təşkil ediləcək, əməliyyat tapşırıqları keçiriləcək, ehtiyatda olan generallarla, peşəkar zabitlərlə görüşlər keçiriləcəkdir. Əsasən gənclərin proseslərə fəal cəlb edilməsi üçün qeyri-fəal təlim metodlarından istifadə ediləcək. İştirakçılar düşərgə daxili çempionatlarda iştirak edəcəklər. Bu oyunlarda mövzular Azərbaycan mədəniyyətinə, tarixinə həsr ediləcəkdir. Yarış qalibləri və fəalları sonda mükafatlandırılacaqlar. Rol oyunlarında iştirakçılar özləri praktik cəhətdən fəaliyyətə cəlb olunacaqlar. Düşərgədə 40 nəfər gənc iştirak edəcəkdir.
Düşərgədə iştirak etmək istəyən gənclər 30 oktyabr 2013-cü il, saat 18:00-dək aşağıdakı ünvana e-mail vasitəsilə özləri haqqında məlumat göndərməklə qeydiyyatdan keçə bilərlər: [email protected]
Düşərgəyə seçim iki mərhələdə aparılacaq. İlkin olaraq gənclərin göndərdiyi məlumatlar incələnəcək, seçilmiş gənclər müsahibəyə dəvət olunacaqlar.
Nəzərinizə çatdıraq ki, həyata keçiriləcək hərbi vətənpərvərlik düşərgəsi “Gənclərin Töhfəsi” İctimai Birliyi tərəfindən həyata keçirilən 6-cı hərbi vətənpərvərlik düşərgəsidir.
