16 sentyabr 2018-ci il tarixində IDEA İctimai Birliyi, Azərbaycan Respublikasının Gənclər Fondu, “Təmiz Şəhər” ASC və “Cavan” Gənclər Hərəkatı İctimai Birliyinin birgə təşkilatçılığı ilə növbəti ənənəvi sahilyanı təmizlik aksiyası keçirilmişdir.
Beynəlxalq Sahilyanı Təmizlik Günü, eyni zamanda çimərlik mövsümünün bitməsi ilə əlaqədar təşkil edilən təmizlik aksiyası Buzovna çimərliyi ərazisində baş tutmuşdur.
Sözügedən aksiyaya Sabunçu və Xəzər rayon Gənclər Evinin təbiətsevər gəncləri, ali və orta təhsil müəssisələrinin tələbələri, gənclər təşkilatlarının fəal üzvləri və ictimaiyyət nümayəndələri olmaqla ümumilikdə 300 nəfərdən çox könüllü gənc qoşulmuşdur.
Tədbirin əsas məqsədi dəniz sahillərində təmizliyə riayət olunmasını təbliğ etmək, sahilyanı ərazilərin məişət tullantıları ilə zibillənməsinin qarşısını almaq və bütün gəncləri dəniz ətraf mühitinin mühafizəsi uğrunda mübarizəyə cəlb etməkdir.
Aksiya zamanı zəruri sanitar ləvazimatlarla təmin olunmuş iştirakçılar çimərlikdən topladıqları tullantıları birgə çeşidləyərək çimərliklərdə ən çox müşahidə olunan zibilləri müəyyən ediblər. Tullantıların toplanması prosesini daha effektiv təşkil etmək məqsədi ilə əraziyə xüsusi texnika da cəlb olunmuşdur. Daha sonra, bütün tullantılar Balaxanı Bərk Məişət Tullantılarının Çeşidlənməsi Zavoduna təhvil verilmişdir.
Tullantıların toplanmasının ardından gənclər təmizlənmiş ərazidə musiqi sədaları altında əylənərək futbol, voleybol, badminton və s. kimi idman növlərində özlərini sınayıb, eyni zamanda müsabiqə və interaktiv oyunlarda iştirak edərək hədiyyələr qazanıblar.
IDEA İctimai Birliyi yerli və beynəlxalq tərəfdaşlarla birgə mütəmadi olaraq Azərbaycan və regionun su bioresurslarının qorunub saxlanılması, artırılması və mühafizəsi məqsədilə Xəzər sahillərində, Kür və digər çaylarda təmizlik aksiyaları təşkil edir.
“Sahillər təmiz qalsın” şüarı adı altında keçirilən təmizlik aksiyası Xəzər dənizi sahillərində gənclərin kütləvi iştirakı ilə baş tutan sayca 10-cu aksiyadır. Bu aksiyalar çərçivəsində ümumilikdə sahillərdən 50 tona yaxın tullantı toplanaraq çeşidlənmiş və təkraremala göndərilmişdir.
Aksiya tərəfdaşları tədbirə qoşulan bütün təbiətsevər gənclərə təşəkkür edir, hər kəsi Planetimizi çirkləndirməməyə və ətraf mühitin qayğısına qalmağa çağırır!
