Azərbaycanın ən böyük və ən sevilən gənclər festivalı olan Yay Fest 2025 üçün qeydiyyat açıq elan edilib. Yay Fest hər il gənclər arasında şəbəkələşmənin gücləndirilməsi, yeni dostluqların qazanılması və vətəndaş cəmiyyətinə töhfə verəcək təşəbbüslərin formalaşması baxımından unikal imkanlar yaradır. Bu il “Konstitusiya və Suverenlik İli”nə həsr olunan Festival Azərbaycan Respublikasının Gənclər Fondunun dəstəyi, “İDEA” İctimai Birliyi, Azərbaycan Tələbə Gənclər Təşkilatları İttifaqı, Azərbaycan Könüllü Təşkilatları İttifaqı, “CAVAN” Gənclər Hərəkatı İctimai Birliyi və “Gənc Könüllülər” İctimai Birliyinin birgə təşkilatçılığı ilə Şamaxıda təşkil olunacaq.
Ənənə halını alan və 5-ci dəfədir ki, keçirilən Festivalın məqsədi “Konstitusiya və Suverenlik İli” çərçivəsində genişmiqyaslı və sistemli maarifləndirmə işinin aparılması, Qarabağ zəfərinin 5 illiyinin qeyd edilməsi, gənclərin milli ruhunun artırılması, milli ideoloji hazırlığının gücləndirilməsi və hüquqi biliklərinin artırılmasıdır.
7 iyul – 29 avqust tarixlərini əhatə edəcək Festival müddətində Milli mənəvi dəyərlər (Milli kimlik), Həmrəylik, Humanizm, Ədalət və qanun, İnkişaf, Vətənpərvərlik, Müstəqillik tarixi, Qalib diplomatiya adlı 8 ardıcıl düşərgə həyata keçiriləcək. Festivalda ümumilikdə 2000-dən çox gəncin iştirakı nəzərdə tutulub və düşərgə iştirakçıları üçün bütün zəruri şərait təşkilatçılar tərəfindən təmin ediləcək.
Çadır tipli düşərgə zamanı gənclərin asudə vaxtlarını səmərəli keçirmələri üçün açıq havada müxtəlif mövzular üzrə dövlət qurumları və özəl şirkətlərin nümayəndələrinin iştirakı ilə panel müzakirələr, Konstitusiya və suverenlik mövzusunda maarifləndirici sessiyalar, peşəkar təlimlər, idman yarışları, əyləncəli və intellektual oyunlar, master-klasslar, vörkşoplar, konsert proqramı və s. təşkil ediləcək.
Azərbaycan Respublikasının Gənclər Fondu gəncləri http://yayfest.az/ veb-səhifəsi vasitəsilə qeydiyyatdan keçərək düşərgədə iştirak üçün seçimlərə qatılmağa dəvət edir. Seçimlər zamanı 18-25 yaş arası ictimai fəallığı ilə seçilən gənclərə üstünlük veriləcək. Hər gənc yalnız bir düşərgədə iştirak edə bilər.
