Bu gün Moldava Milli Tarix Muzeyində Azərbaycan xalqının Ümummilli Lideri Heydər Əliyevin anadan olmasının 100 ili ilə bağlı Moldova Respublikasında “Karabakh is Azerbaijan” – Azərbaycan-Moldova Gənclər Forumu öz işinə başlayıb. Forum Azərbaycan Gənclər Fondunun dəstəyi, Azərbaycan Respublikasının Moldova Respublikasındakı səfirliyinin və Moldova Azərbaycanlıları Konqresinin tərəfdaşlığı “Gənclərin Təşəbbüsünə və İnkişafına Dəstək” İctimai Birliyinin təşkilatçılığı ilə keçirilib.
Forum Moldova Respublikasındakı fövqəladə və səlahiyyətli səfiri Qüdsi Osmanovun çıxışı ilə başlayıb.
Ulu Öndər Heydər Əliyevin həyat yolundan danışan səfir Osmanov qeyd edib ki, Heydər Əliyev Moldova-Azərbaycan əlaqələrinin rəmzidir: “Təməli Ulu Öndər tərəfindən qoyulan əlaqələr cənab Prezident İlham Əliyev tərəfindən uğurla inkişaf etdirilir”.Çıxışında 20 Yanvar faciəsinin ildönümü ilə bağlı məqama da yerən Qüdsi Osmanov Azərbaycan xalqının başına gətirilən qanlı faciəyə məhz Ulu Öndər sayəsində ilk siyasi-hüquqi qiymət verildiyini, 1990-cı il yanvarın 21-də Sovet rejiminin qadağalarına rəğmən, həyatını təhlükə qarşısında qoyaraq Azərbaycanın Moskvadakı daimi nümayəndəliyinə gəldiyini, qanlı faciənin təşkilatçılarını dünya ictimaiyyəti qarşısında ittiham etdiyini, ifşaedici və cəsarətli bir bəyanat verdiyinidi də bildirib. Tədbirin təşkilatçısı, “Gənclərin Təşəbbüsünə və İnkişafına Dəstək” İctimai Birliyinin sədri, “Diaspor” İnformasiya Mərkəzinin direktoru Toğrul Allahverdili çıxışında iki ölkənin bənzər taleyindən bəhs edərək qeyd edib ki, bu kimi layihələr davamlı olmalı və gənclər arasında əlaəqələrə öz töhfəsini verməlidir. Forumda Moldova parlamentinin deputatı, Moldova-Azərbaycan Parlamentlərarası Dostluq qrupunun həmsədri Vitali Jako, Moldova Baş nazirinin insan hüquqları üzrə müşaviri Nikolay Rediste, Moldova Milli Azlıqlar üzrə Dövlət Agentliyinin sədri Dmitri Moroz, Moldova Milli Kitabxanasının direktoru İlena Penteley, Azərbaycan Mətbuat Şurasının İdarə Heyətinin üzvü, “Yeni Çağ” Media Qrupunun rəhbəri Aqil Ələsgər, “DAVAM” Gənclər Hərəkatının sədri Nihad Allahyarlı, Moldova universitetlərinin təmsilçiləri və moldovalı gənclər çıxış edərək Forumun iki ölkə gəncləri üçün önəmindən bəhs ediblər. Muzeydə forum çərçivəsində Ulu Öndər Heydər Əliyevin həyat yolundan bəhs edən foto sərgi də nümayiş etdirilib. Ulu Öndərə həsr olunan sərgi moldovalı gənclər tərəfindən maraqla qarşılanıb.