Gürcüstanın Marneuli rayonunda Marneuli Mədəniyyət Mərkəzində “Qrinviç” Təhsil Mərkəzinin təşkilatçılığı ilə 30 oktyabr tarixində “Poeziya Günü” keçirilib. Tədbirdə mərkəzin fəal gənclərinin ifasında Azərbaycan ədəbiyyatının görkəmli simaları Məhəmməd Füzuli, Hüseyn Arif, Səməd Vurğun, Məmməd Araz, Zəlimxan Yaqub, Əli Kərim və başqalarının şeir və qəzəlləri tar musiqi alətinin müşayəti ilə səsləndirilib.
Tədbirdə həmçinin Azərbaycan xalqının çoxəsrlik ənənələrə malik bədii və fəlsəfi fikrində dərin iz qoymuş, şərq xalqlarının mədəni sərvətlər xəzinəsində özünəməxsus layiqli yeri olan mütəfəkkir şair İmadəddin Nəsiminin 650 illik yubileyi münasibətilə dünyanın dörd bir tərəfində Nəsimi yaradıcılığına həsr olunmuş tədbirlərdən söz açılıb və “Zaman Mənəm” sənədli filmi, “iki aləmdə varım” audio kitabı nümayiş edilib.
Yeniyetmə və gənclər, valideynlər, təhsil ictimaiyyəti, Marneuli şəhər ictimaiyyəti və KİV nümayəndələrinin iştirak etdiyi “Poeziya Günü”ndə Marneuli şəhər merinin gənclərlə wnsiyyət sahəsində məsləhətçisi Adil Əliyev, “Odlar Yurdu” Gənclər İctimai Birliyinin sədri Nigar Ələsgərova, “Qrinviç” Təhsil Mərkəzinin “erkən inkişaf və məktəbəqədər hazırlıq departamenti”nin rəhbəri Anna Allahverdiyeva çıxış ediblər. Tədbir böyük rəğbətlə qarşılanıb.
Məlumat üçün bildirək ki, 2019-cu ildə Nəsiminin anadan olmasının 650 illiyinin dövlət səviyyəsində layiqincə qeyd edilməsi məqsədi ilə Azərbaycan Respublikası Prezidentinin müvafiq Sərəncamı ilə “Nəsimi ili” elan edilib. Sərəncamdan irəli gələrək Azərbaycanda “Nəsimi ili” təntənə ilə qeyd edilir. Bununla yanaşı, dünyanın bir çox ölkəsində Nəsimi yaradıcılığına aid çoxsaylı tədbirlər keçirilməkdədir. “Nəsimi ili”nin elan olunmasını nəzərə alaraq “Odlar Yurdu” Gənclər İctimai Birliyi tərəfindən də Azərbaycan Gənclər Fondunun maliyyə dəstəyi ilə “İmadəddin Nəsimi- 650 illik DƏYƏR” adlı layihə həyata keçirilib. Layihə çərçivəsində “Zaman MƏNƏM” sənədli filmi, “iki aləmdə varım” audio kitabı hazırlanıb. Filmin ölkə ərazisində 11 təqdimatı keçirilib.
