25 sentyabr 2025-ci il tarixində Bakıda “Rəqəmsal Marketinq: Gənclər üçün karyera imkanları” adlı panel müzakirəsi baş tutub. Tədbir Gənclərin İnkişaf və Karyera Mərkəzinin təşkilatçılığı, Azərbaycan Respublikasının Gənclər Fondu, “Div Academy” və “Fikir Coworking”in tərəfdaşlığı ilə keçirilib. Layihənin əsas məqsədi gənclərə rəqəmsal marketinq sahəsindəki mövcud karyera imkanlarını tanıtmaq, onların bilik və bacarıqlarını inkişaf etdirmək və bu sahədə şəbəkələşmələrinə dəstək göstərmək olub.

Açılış mərasimində Azərbaycan Respublikasının Gənclər Fondunun İnformasiya texnologiyaları və ictimaiyyətlə əlaqələr şöbəsinin müdiri Pərvanə Cəlallı, Gənclərin İnkişaf və Karyera Mərkəzinin İctimaiyyətlə əlaqələr və kommunikasiya şöbəsinin müdiri Nuranə Rzayeva çıxış ediblər. Çıxışlarda rəqəmsal marketinqin gənclərin karyera inkişafında önəmli rol oynaması, bu sahənin əmək bazarında artan tələbatı və yeni karyera imkanları barədə fikirlər səsləndirilib.

Panel müzakirəsində “Nar” şirkətinin rəqəmsal marketinq üzrə mütəxəssisi Səhər Quliyeva, “Bravo Technologies” şirkətinin rəhbəri və marketinq eksperti Saday Alverdiyev, “Guavapay”in rəqəmsal marketinq rəhbəri, “Div Academy”nin rəqəmsal marketinq müəllimi Tərlan Məmmədli və “Bepositive.az” platformasının təsisçisi, marketinq mütəxəssisi Ələmdar Manafov spiker qismində çıxış ediblər.

Müzakirələr zamanı spikerlər rəqəmsal marketinqin üstünlükləri, gənclər üçün inkişaf perspektivləri və sahə üzrə tələb olunan əsas bacarıqlar barədə öz təcrübələrini bölüşüblər.

Panel müzakirəsindən sonra keçirilən sual-cavab sessiyasında iştirakçılar spikerlərə suallarını ünvanlayaraq mövzu ətrafında geniş müzakirə aparıblar və onları maraqlandıran məsələlərlə bağlı ətraflı cavab alıblar.

Tədbir gənclərin rəqəmsal marketinq üzrə biliklərini artırmasına, yeni bacarıqlar kəşf etməsinə və sahənin mütəxəssisləri ilə şəbəkələşməsinə imkan yaradıb.