[imageeffect type=”frame” align=”alignleft” width=”240″ height=”154″ alt=”” url=”http://youthfoundation.az/wp-content/uploads/2013/06/NDA_1140.jpg” ]
30-31 may 2013-cü il tarixində Bakıda “Bizim sahibkarlıq fəaliyyətimiz (Enactus)” beynəlxalq proqramı üzrə VIII Milli Yarış keçirilib. “Bizim Sahibkarlıq Fəaliyyətimiz” (Entrepreneurial Action Us – Enactus) beynəlxalq proqramının əsası 1975-ci ildə ABŞ universitetləri tərəfindən qoyulmuşdur. 1996-cı ildən etibarən dünyanın bir çox ölkələrində proqram üzrə milli yarışlar keçirilməyə başlanılmış və 2001-ci ilin iyul ayında ilk dəfə Londonda Dünya Kuboku yarışı keçirilmişdir. 2005-ci ildən Azərbaycan “Enactus” proqramına qoşulmuş, 2006-cı ildən isə Dünya Kubokları yarışlarında iştirak etmək hüququnu qazanmışdır. Dünya üzrə “Enactus” proqramına 50-ə yaxın ölkə, 1600-dan çox ali təhsil müəssisəsi və 50000-dən çox tələbə qoşulmuşdur.
“Enactus” proqramı üzrə milli yarışların keçirilməsində məqsəd sahibkarlıq fəaliyyətinə gəncləri təşviq etmək, azad sahibkarlıq ideyasını tələbələr arasında təbliğ etmək, tələbələrin təşkilatçılıq, idarəçilik və komandada işləmək bacarıqlarını inkişaf etdirməkdən ibarətdir. Proqramın sosial əhəmiyyəti insanların həyat və yaşam standartlarının yaxşılaşdırılması, gənclərin məşğulluğuna dəstək göstərilməsi və biznesin gücü vasitəsilə insanların həyatlarının müsbətə doğru dəyişdirilməsidir.
“Enactus” proqramı üzrə milli yarışda iştirakçı komandalar liqalara bölünür və qalibiyyət uğrunda mübarizə aparır. İnnovativ yanaşmaya, layihələrin sosial effektinə, ekoloji standartların qorunmasına, biznes etikasının gözlənilməsinə, maliyyə idarəçiliyinə, nitq qabiliyyətinə və digər meyarlara əsasən qalib komanda müəyyən edilir. Qeyd etmək lazımdır ki, “Enactus” proqramı üzrə yarış biznes və təhsil sahəsində işgüzar danışıqların aparılması məqsədilə gənclər üçün yaradılmış platformadır.
30 may 2013 –cü il tarixində keçirilən Milli Yarışın açılış mərasimində Azərbaycan Respublikasının Gənclər və İdman Nazirliyinin Gənclərlə İş üzrə Şöbəsinin müdiri İndira Hacıyeva, Azərbaycan Respublikasının Prezidenti Yanında Gənclər Fondunun Aparat Rəhbəri Faiq Qürbətov, AGBank ASC-nin nümayəndəsi Əkrəm Abdullayev, Enactus Proqramının MDB ölkələrinin Vitse Prezidenti Yusuf Məcidov, Enactus Qırğızıstanın Prezidenti Carkınay Talantbekova və Enactus Azərbaycanın Ölkə Direktoru Kəmalə Məmmədli çıxış etmişlər. Enactus Azərbaycan Nümayəndəliyi 2012/2013 –cü illərdə əməkdaşlıq etdiyi Dövlət Strukturlarına və Şirkətlərə plaketlər təqdim edib.
2012/2013-cü tədris ilində “Enactus” proqramına 13 komanda qoşulmuş və 30-31 may 2013-cü il tarixində keçirilən Milli Yarışda 11 komanda 2 liqada icra olunmuş layihələri təqdim etmişlər. Yarışda aşağıdakı komandalar iştirak etmişlər:
– Azərbaycan Respublikasının Prezidenti Yanında Dövlət İdarəçilik Akademiyası
– Azərbaycan Dövlət İqtisad Universiteti
– Qafqaz Universiteti
– Azərbaycan Dövlət Aqrar Universiteti
– Azərbaycan Texnologiya Universiteti
– Azərbaycan Müəllimlər İnstitutunun Gəncə Filialı
– Azərbaycan Dövlət Pedaqoji Universiteti
– Azərbaycan Dövlət Mədəniyyət və İncəsənət Universiteti
– M.V. Lomonosov adına Moskva Dövlət Universitetinin Bakı Filialı
– Bakı Slavyan Universiteti
– Naxçıvan Dövlət Universiteti
Liqalarda iştirak edən münsiflər heyəti komandaların layihələrini “Enactus” meyarları əsasında seçmişlər. Münsiflər heyəti dövlət və biznes strukturları təmsil edən nüfuzlu və təcrübəli mütəxəssislərdən ibarət olub. Hər iki liqadan Final mərhələsinə 2 komanda seçilib. Liqalardan bu komandalar seçilmişlər:
– Azərbaycan Respublikasının Prezidenti Yanında Dövlət İdarəçilik Akademiyası
– Naxçıvan Dövlət Universiteti
– Qafqaz Universiteti
– Azərbaycan Dövlət Mədəniyyət və İncəsənət Universiteti
Finalda Qafqaz Universiteti qalib olub. Yarışın nəticələri təntənəli şəkildə elan edilib. Qalib komandanı-Qafqaz Universitetini Azərbaycan Respublikasının Gənclər və İdman nazirinin müavini İntiqam Babayev, 2 ci yerin sahibini-Azərbaycan Respublikasının Prezidenti yanında Dövlət İdarəçilik Akademiyasını Nobel Oil Ltd Şirkətinin Azərbaycan Respublikasındakı Filialının Baş Menecerinin müavini Kənan Cəfərov və 3-cü yerin sahibini-Naxçıvan Dövlət Universitetini KPMG Azərbaycan Ltd Şirkətinin Audit Departamentinin rəhbəri Müşfiq Əliyev təqdim etmişlər.
Yarışda ən yaxşı sosial, biznes və ekoloji nominasiyalar üzrə komandalara sertifikatlar verilib.
Beləliklə, Qafqaz Universiteti ölkəmizi 29 Sentyabr-2 Oktyabr 2013-cü il tarixində Meksikanın Kankun şəhərində keçiriləcək Dünya Kuboku yarışında təmsil edəcək.
“Enactus” Beynəlxalq Proqram üzrə VIII Milli Yarış Azərbaycan Respublikasının Gənclər və İdman Nazirliyinin, Azərbaycan Respublikasının Prezidenti yanında Gənclər Fondunun, “AGBank” ASC-nin, “Nobel Oil MMC” Şirkətinin Azərbaycan Respublikasındakı Filialının və “KPMG Azərbaycan” Şirkətinin maliyyə və təşkilati dəstəyi ilə keçirilmişdir.
[divider_line opacity=”10″ /] [postgallery_grid content=”image” columns=”4″ lightbox=”yes” attached_id=”7248″ id=”7248″ imageeffect=”reflection” imgheight=”154″ imgwidth=”240″ width=”980″ /]
