“Bakı Gənclər Klubu” İctimai Birliyi Azərbaycan Respublikasının Prezidenti yanında Gənclər Fondunun maliyyə dəstəyi ilə 20 sentyabr – 20 dekabr 2017-cı il tarixlərində həyata keçirdiyi  “Vətən səninlə öyünür, qəhrəman!” adlı layihənin icrasını yekunlaşdırmışdır.
Layihənin məqsədi – gəncləri Qarabağ müharibəsi zamanı döyüşçülərimizin göstərdiyi şücaət və qəhrəmanlıq anları ilə tanış edərək, hərbi vətənpərvərlik ruhunu yüksəltmək idi.
Layihə çərçivəsində Bakı Dövlət Universitetinin dosenti və müharibə iştirakçısı – Atamoğlan Məmmədli təlimlərdə gənclərə I Qarabağ müharibəsinin səbəbləri, gedişi, müharibə zamanı həyata keçirilən döyüşlər, əməliyyatlar və s. haqqında geniş məlumat vermişdir. Bu təlimlərlə yanaşı müharibədə rəşadət göstərmiş döyüşçülərimiz, şəhid ailələri ilə görüşmək və canlı şahidlərdən yeni məlumatlar toplamaq üçün Lənkəran, Masallı, Biləsuvar, Cəliləbad rayonlarına səfərlər təşkil olunmuşdur.
Qeyd olunan səfərlər zamanı ən yadda qalan anlar layihə iştirakçılarında Lənkəran və Biləsuvar rayonlarında yaşanılmışdır. Lənkəran rayonuna səfər zamanı layihə iştirakçıları FHN-in Mülki Müdafiə Qoşunlarının N saylı hərbi hissəsində əsgərlərimizin gündəlik xidməti həyatı və yaradılmış təlim şəraiti ilə yaxından tanış olmuşdurlar. Həmçinin, rayon qazılərin, əsgərlərin, zabit heyətin və gənclərin iştirakı ilə keçirmiş tədbirdə layihənin məqsədi, görülən işlər, keçirilən görüşlər haqqında ətraflı məlumatlar verilmiş, müasir gəncliyin vətənpərvər ruhunda yetişdirilməsində bu istiqamətdə keçirilən layihələrin vacibliyindən danışılmış və müharibə zamanı həyata keçirilmiş qanlı döyüşlər, əhəmiyyətli əməliyyatlar haqqında məlumatlar əldə edilmişdir.
Biləsuvar rayonunda keçirilmiş görüş ilə yanaşı layihə iştirakçıları, həmçinin, Nərimankənd kəndində yerləşən şəhid Rahil Hüseynovun ev muzeyinə səfər etmiş, şəhidin keçdiyi həyat yolu və yarımçıq qalmış arzuları ilə yaxından tanış olmuşdular.
Layihənin yekunu olaraq təşkilamızın təşəbbüsü ilə, Bakı şəhərində döyüşçülər ilə artıq ikinci dəfə görüş təşkil olunmuş və qazılərdən iştirak etdikləri döyüşlər və əməliyyatlar haqqında yeni məlumatlar əldə edilmişdir. Sonda layihə iştirakçılarına döyüşçülər tərəfindən sertifikatlar təqdim olunmuşdur.
Qeyd etmək istəyirik ki, təlimlər və səfərlər zamanı layihə iştirakçıları tərəfindən əldə olunan məlumatlar çap olunan buklet və kitabçalarda öz əksini tapmış və digər gənclər arasında paylanılmışdır.