2016-cı il dekabrın 28-də Azərbaycan Respublikasının Prezidenti yanında Gənclər Fondunun Müşahidə Şurasının 19-cu iclası keçirilmişdir.
Müşahidə Şurasının sədri, Prezident Administrasiyasının İctimai-siyasi məsələlər şöbəsi müdirinin müavini Tahir Süleymanov bildirmişdir ki, iclasın gündəliyinə Fondun 2016-cı ildəki fəaliyyətinə dair hesabata rəy verilməsi, 2017-ci ildə elan ediləcək qrant müsabiqələrinin istiqamətlərinin müəyyənləşdirilməsi və digər məsələlərin daxil edilməsi təklif olunur.
Gündəlik təsdiq edildikdən sonra, Fondun icraçı direktoru Fərhad Hacıyev qurumun 2016-cı ildə gördüyü işlər barədə məlumat vermişdir. Qeyd edilmişdir ki, ötən il ərzində gənclər təşkilatları və 16-29 yaşlı fiziki şəxslər üçün 2 qrant müsabiqəsi təşkil olunmuş, ümumilikdə 1008 layihə maliyyələşdirilmişdir. Onların reallaşdırılması üçün Fond tərəfindən 4 859 300 manat vəsait ayrılmışdır. Dəstəklənmiş təşəbbüslər arasında yeniyetmə və gənclərin vətənpərvərlik ruhunda tərbiyəsi, peşə bacarıqlarının inkişaf etdirilməsi, kiçik biznes quruculuğunda və kənd təsərrüfatının inkişafında rolunun artırılması, ətraf mühitin qorunması, sağlam həyat tərzinin təbliği, incəsənət sahələri üzrə müsabiqə və sərgilərin təşkili, istedadlı gənclərin ixtiralarının və innovativ ideyalarının stimullaşdırılması, region gənclərinin ictimai fəallığının artırılması, Ermənistan-Azərbaycan Dağlıq Qarabağ münaqişəsi barədə həqiqətlərin dünya ictimaiyyətinə çatdırılması, Azərbaycanın gənclər təşkilatlarının beynəlxalq gənclər platformaları ilə əməkdaşlığının inkişaf etdirilməsi kimi istiqamətlər üstünlük təşkil etmişdir. Azərbaycan Respublikası Prezidentinin müvafiq sərəncamına uyğun olaraq, hesabat ili ərzində müsabiqə mövzuları sırasına Gəncə şəhərinin “2016-cı il Avropa gənclər paytaxtı” seçilməsi ilə bağlı təşəbbüslər də daxil edilmişdir. 8-ci və 9-cü qrant müsabiqələri çərçivəsində gənclər təşkilatlarının Gəncə şəhərində keçirilməsi planlaşdırılan 33 yerli və 9 beynəlxalq, fiziki şəxslərin isə 59 layihəsinə dəstək verilmiş, onların icrası üçün 686.100 manat vəsait ayrılmışdır. İl ərzində Fondun fəaliyyətinə maraq artmış, müraciət edənlərin sayı çoxalmışdır.
2016-cı il ərzində layihələrin icra olunduğu şəhər və rayonlarda Fondun aparatı tərəfindən monitorinqlər keçirilmiş, aşkar edilən nöqsanlarla bağlı qeydlər aparılmış və resipiyentlərin yekun hesabatlarının qəbulu zamanı nəzərə alınmışdır.
Təqdim olunmuş hesabatda 95 gəncin dünyanın 33 ölkəsində keçirilmiş simpozium, konfrans, seminar, müsabiqə, olimpiada, festival və digər tədbirlərdə iştirakına maliyyə dəstəyinin verildiyi diqqətə çatdırılmış, Azərbaycan həqiqətlərinin daha geniş auditoriyalarda təbliği baxımından həmin səfərlərin əhəmiyyəti vurğulanmışdır.
Müşahidə Şurasının üzvləri Fondun 2016-cı ildəki fəaliyyətinə dair hesabatı ilə bağlı fikir və təkliflərini səsləndirmiş, sənədə bütövlükdə müsbət rəy verilməsini məqsədəuyğun saymışlar. Təkliflər nəzərə alınmaqla hesabatın təkmilləşdirilməsi və Azərbaycan Respublikasının Prezidentinə təqdim edilməsi tövsiyə olunmuşdur.
Fondun aparat rəhbəri Faiq Qürbətov 2017-ci ildə elan ediləcək qrant müsabiqələrinin istiqamətləri ilə bağlı təkliflər barədə məlumat vermişdir. Müşahidə Şurasının üzvləri yeniyetmə və gənclərin vətənpərvərlik ruhunda tərbiyəsi, intellektual potensialının və ictimai fəallığının artırılması, sağlam fiziki inkişafının təmin edilməsi kimi istiqamətlərin bundan sonra da prioritet olmasını zəruri saymaqla yanaşı, növbəti müsabiqələrin mövzuları sırasına gənc sahibkarların stimullaşdırılması, ənənəvi peşə sahələrinə marağın artırılması, natiqlik bacarıqlarının inkişaf etdirilməsi, 4-cü İslam Həmrəyliyi Oyunları və “Formula 1 Azərbaycan Qran Prisi” ilə bağlı təşəbbüslərin də əlavə edilməsinin məqsədəuyğun olduğunu vurğulamışlar.
İclasda 2017-ci ilin ilk rübündə Müşahidə Şurasına seçkilərin təşkil ediləcəyi barədə məlumat verilmişdir. Bildirilmişdir ki, Fondun Nizamnaməsininə uyğun olaraq, Müşahidə Şurası 5 üzvü dövlət orqanlarından, 4-ü isə gənclər təşkilatlarının nümayəndələrindən ibarət tərkibdə formalaşdırılmalıdır. Dövlət orqanlarının nümayəndələri həmin qurumların rəhbərləri tərəfindən, gənclər təşkilatlarının təmsilçiləri isə seçki yolu ilə müəyyənləşdirilir. Səsləndirilən təkliflər əsasında, Müşahidə Şurası üzvlüyünə namizədlərin irəli sürülməsi üçün 2017-ci ilin fevral ayında gənclər təşkilatlarının toplantısının keçirilməsi barədə qərar qəbul olunmuşdur.
Gündəlikdəki məsələlərlə bağlı müzakirələrdə Müşahidə Şurasının üzvləri – gənclər və idman nazirinin müavini İntiqam Babayev, təhsil nazirinin müavini Ceyhun Bayramov, mədəniyyət və turizm nazirinin müavini Nazim Səmədov, Maliyyə Nazirliyinin Sosial sahələrin maliyyəsi şöbəsi müdirinin müavini Cavid Məmmədov, Azərbaycan Tələbə Gənclər Təşkilatları İttifaqının sədri Şahin İsmayılov, “Gənclərin İntellektual İnkişafına Yardım” İctimai Birliyinin İdarə Heyətinin sədri Seymur Orucov, “Bizim Nəsil” Gənclərin Regional İnkişaf Assosiasiyasının sədri Nurəddin Mehdiyev, Gənclər Təşkilatları Milli Şurasının təmsilçisi Şahin Seyidzadə, Fondun aparatının rəhbəri Faiq Qürbətov və baş mühasibi Elmar Talıblı iştirak etmişlər.
