[imageeffect type=”frame” align=”alignleft” width=”240″ height=”154″ alt=”” url=”http://youthfoundation.az/wp-content/uploads/2012/11/photo.jpg” ]

Azərbaycan Gənclər Fondunun maliyyə dəstəyi ilə Atəşgah İntellektual Oyunlar Klubu, Xəzər İntellektual Gənclər Klubu və “İrəli” İctimai Birliyinin birgə təşkil edəcəyi Nə? Harada? Nə zaman? oyunu üzrə Tələbələrarası Azərbaycan Çempionatının keçirilməsi üçün lazım olan rəsmi lisenziya alınıb. Ölkə çempionatlarının keçirilməsi üçün müstəsna hüquqlara malik Beynəlxalq Klublar Assosiasiyasının (BKA) üzvləri olan Azərbaycan klubları (Atəşgah İntellektual Oyunlar Klubu, Turan İntellektual Oyunlar Klubu, Xəzər İntellektual Gənclər Klubu) qeyd olunan beynəlxalq təşkilata müraciət edərək Tələbələrarası Azərbaycan Çempionatını lisenziyalaşdırıblar.

Azərbaycan İntellektual Oyunlar Federasiyasının mətbuat xidmətindən verilən məlumata görə, BKA-nın Lisenziyalaşdırma komissiyasının sədri Aleksandr Druz lisenziyanın şərtlərinə görə Azərbaycan Çempionatının nəticələrinin BKA-nın rəsmi reytinqində öz əksini tapacağını bildirib. Bu nəticələr Azərbaycan komandalarının reytinqdə irəliləməsinə öz təsirini göstərəcək.

Xatırladaq ki, Nə? Harada? Nə zaman? oyunu üzrə Tələbələrarası Azərbaycan Çempionatı 25 noyabrda 45 komandanın iştirakı ilə “Kempinski Hotel Badamdar”da təşkil olunacaq.