[imageeffect type=”frame” align=”alignleft” width=”240″ height=”154″ alt=”” url=”http://youthfoundation.az/wp-content/uploads/2013/06/723294264.jpg” ]
“Azərbaycan-Avropa Gənclərinin Əməkdaşlığı” İctimai Birliyi Azərbaycan Respublikasının Prezidenti yanında Gənclər Fondunun maliyyə dəstəyi ilə yeni layihə həyata keçirir. “Beynəlxalq Mədəniyyət Festivalı” adı altında həyata keçiriləcək layihə müxtəlif mədəniyyətlərin tanıtdırılmasına, müxtəlif ölkələrin gəncləri arasında əməkdaşlığın inkişaf etdirilməsinə yönəlib. Əsas məqsəd mədəniyyətlərarası dialoqun gənclər arasında yaradılması ilə humanitar əlaqələrin inkişaf etdirilməsindən ibarətdir. Layihə gələcək əməkdaşlıq üçün bir platforma rolunu oynayacaq və beynəlxalq səviyyədə əlaqələr üçün şəbəkə yaradacaq.
Layihə 5 gün müddətində Bakı və Şəki şəhərində həyata keçirilməklə, 25-30 iyun 2013-cü il tarixlərində reallaşacaq. Layihə 15 nəfər xarici ölkədən, 5 nəfər isə Azərbaycandan olmaqla ümumilikdə 20 nəfər iştirakçını əhatə edəcəkdir. Xarici iştirakçılar İtaliya, Türkiyə, Çin, Gürcüstan, Polşa və digər ölkələrdəndir. Layihə çərçivəsində hər bir xarici ölkədən olan iştirakçı öz ölkəsinin mədəniyyətini, tarixini təqdim edəcək. Bununla yanaşı, onlara Azərbaycan haqqında məlumatlar veriləcək, Bakının tarixi-mədəni yerlərinə ekskursiyalar təşkil olunacaqdır. Layihə çərçivəsində 1 günlük Şəki şəhərinə səfər təşkil olunacaq və xarici qonaqlara Azərbaycan təbiəti və Şəkidə olan tarixi-mədəni yerlər göstəriləcək.
