Azərbaycan Respublikasının Gənclər Fondunun maliyyə dəstəyi ilə “Sosial etika” sosial mediadan səmərəli istifadə üsulları və etik qaydaları adlı layihənin növbəti təlimi uğurla başa çatıb. Təlimdə iştirak edən foto-jurnalist Orxan Əzim sosial mediada fotonun rolundan bəhs edib. Foto-jurnalist təlimdə fotonun texnikası və uğurlu foto çəkməyin sirləri barədə məlumat verib. O, həmçinin günün aktual mövsuzu olan sosial şəbəkələrdə xəbərin foto vasitəsilə ötürülməsi kimi vacib məsələlərə də toxunub. Foto-jurnalist öz təcrübəsini də gənclərlə bölüşüb. Daha çox sənədli fotolara üstünlük verən Orxan Əzim “Çernobıl hadisələrinə” həsr olunan və faciə baş verən ərazidən çəkdiyi fotoları təlimdə nümayiş etdirib. Qeyd edək ki, foto-jurnalistin “Çernobıl hadisələrinə” həsr etdiyi fotolar Birləşmiş Ştatlarda nümayiş olunaraq birincilik qazanıb və mükafata layiq görülüb. Sonda təlim iştirakçıları ilə xatirə fotosu çəkilib.