Azərbaycan Respublikası Nazirlər Kabinetinin 2018-ci il 16 oktyabr tarixli 451 nömrəli qərarı ilə təsdiq edilmiş “Gənclər siyasəti ilə bağlı proqram və layihələrin qrant maliyyələşdirilməsi üzrə müsabiqələrin keçirilməsi qaydası”na əsasən Azərbaycan Respublikasının Gənclər Fondu gənclər təşkilatlarını 12-ci qrant müsabiqəsində iştirak etmək üçün yerli və beynəlxalq layihə kateqoriyaları üzrə müraciətlərini  bu gündən (4 iyun 2019-cu il) təqdim etməyə dəvət edir.

Müsabiqənin məqsədi gənc nəslin fiziki, intellektual və mənəvi inkişafının təmin edilməsinə, vətənpərvərlik ruhunda tərbiyə olunmasına, ictimai fəallığının artırılmasına, innovativ ideyalarının, yaradıcı təşəbbüslərinin, asudə vaxtlarının səmərəli təşkilinin reallaşdırılmasına yönəlmiş layihələri dəstəkləmək, habelə Dövlət Gənclər siyasətinin icrası prosesində yaxından iştirak etmək istəyən gənclər təşkilatlarının layihə təkliflərini qrant şəklində məqsədli maliyyələşdirib, onlar üçün geniş və faydalı fəaliyyət sahəsi yaratmaqdır.

Layihələrin müddəti:

Müsabiqəyə təqdim olunmuş yerli və beynəlxalq layihə kateqoriyaları üzrə müraciətlərin icra müddəti 3 aydan az, 12 aydan çox olmamalıdır.

Layihələrin məbləği:

Yerli layihələr üzrə müraciət məbləğinin dəyəri 10 000 (on min) manatdan, beynəlxalq layihələr üzrə 15 000 (on beş min) manatdan çox olmamalıdır.

Layihələrin təqdim olunmasına dair əsas tələblər:

• Müsabiqədə iştirak etmək üçün gənclər təşkilatları Fondun rəsmi internet saytında (www.youthfoundation.az və ya www.ayf.az) qeydiyyatdan keçməli və saytda əks olunan formaya uyğun olaraq, elektron qaydada müraciət etməlidirlər;
• Gənclər təşkilatlarının qrant müsabiqəsi çərçivəsində müsabiqəyə yerli və beynəlxalq layihə kateqoriyaları üzrə təqdim etdikləri yalnız 1 layihənin Fond tərəfindən maliyyələşdirilməsinə yol verilir;
• Layihələr yerli və beynəlxalq kateqoriyalar üzrə maliyyələşdirilir – Azərbaycan Respublikasında dövlət qeydiyyatına alınmış gənclər təşkilatlarının Azərbaycan Respublikasının ərazisində həyata keçirdiyi layihələr yerli layihələr, ən azı iki xarici ölkədən olan gənclər təşkilatı və beş ölkəni təmsil edən gənclərin iştirakı ilə Azərbaycan Respublikasında dövlət qeydiyyatına alınmış gənclər təşkilatlarının Azərbaycan Respublikasında həyata keçirdiyi, habelə Azərbaycan Respublikasından olan gənclərin iştirakı ilə xarici ölkələrdə həyata keçirilməsi nəzərdə tutulan layihələr beynəlxalq layihələr kateqoriyasına aiddir;
• Digər qurumlar tərəfindən tam maliyyələşdirilmiş, icrası davam edən və ya başa çatmış layihələr Fond tərəfindən əlavə və ya təkrar maliyyələşdirilə bilməz.

Aşağıdakı qrant alanların müsabiqədə iştirakına yol verilmir:

• Fondun maliyyələşdirdiyi və icra müddəti bitməyən layihələrin icraçıları;
• Fondun maliyyələşdirdiyi və icra müddəti bitmiş, lakin yeni müsabiqə çərçivəsində layihələrin qəbulu üçün müəyyən edilmiş son tarixə 15 (on beş) gün qalmış maliyyə hesabatlarını Fonda təqdim etməmiş qrant alanlar;
• Siyasi, xeyriyyə, kommersiya və dini fəaliyyəti nəzərdə tutan layihələr Fond tərəfindən maliyyələşdirilmir.

Layihələr seçilərkən üstünlük veriləcək meyarlar:

Müraciətlərə Azərbaycan Respublikasının Gənclər Fondunun Müşahidə Şurasının 04 oktyabr 2018-ci il tarixli Q-03 nömrəli Qərarı ilə təsdiq edilmiş “Azərbaycan Respublikasının Gənclər Fonduna gənclər siyasəti ilə bağlı proqram və layihələrin qrant maliyyələşdirilməsi üzrə müsabiqələr çərçivəsində və müsabiqədən kənar gənclər təşkilatlarından daxil olan layihə təkliflərinin ekspertiza və qiymətləndirmə meyarları”na və əlavə olaraq da aşağıda qeyd edilənlərə əsasən baxılır:

• Dövlət qeydiyyatına alınmış gənclər təşkilatları tərəfindən təqdim edilən layihələrin nizamnaməsinə əsasən fəaliyyət istiqamətinə uyğun təqdim edilən layihələrə
• Müraciət olunan layihələrin mövzulara uyğun olması, minimum 3 şəhər və ya rayonda həyata keçirilməsi və ya minimum 3 şəhər və rayondan gənclərin əhatə olunmasını nəzərdə tutan layihələrə.

Müsabiqənin başlama tarixi:

• Layihə təklifləri 4 iyun 2019-cu il tarixindən başlayaraq təqdim edilə bilər.

Layihə təkliflərinin qəbulu üçün son tarix:

• Layihə təklifləri üçün son müraciət tarixi 4 iyul 2019-cu il, saat 18:00-dək müəyyən edilib.Fond, ölkə üzrə müxtəlif rayon və şəhərlərdə qeydiyyatda olan və aktiv fəaliyyət göstərən gənclər təşkilatlarını layihə təklifləri ilə 12-ci qrant müsabiqəsində fəal iştirak etməyə dəvət edir.
• Qeyd 1: Azərbaycan Respublikasının Gənclər Fondunun Müşahidə Şurası tərəfindən təsdiqlənən layihə müraciətləri üzrə mövzularla aşağıdakı keçid vasitəsi ilə tanış ola bilərsiniz:

Yerli layihələr üzrə mövzular      Beynəlxalq layihələr üzrə mövzular

• Qeyd 2 : Azərbaycan Respublikasının Gənclər Fonduna gənclər siyasəti ilə bağlı proqram və layihələrin qrant maliyyələşdirilməsi üzrə sənəd və materiallar toplusu ilə buradan tanış ola bilərsiniz.
  
• Qeyd 3 : Azərbaycan Respublikasının Gənclər Fondunun rəsmi internet saytının yenilənməsini nəzərə alaraq gənclər təşkilatlarının qrant müraciəti zamanı təşkilatları haqqında məlumatları sistemdə yeniləmək məqsədi ilə Fondun elektron sisteminə daxil olarkən məlumatların yenilənməsi tələb olunur. Bundan sonra təşkilat öz layihə təklifi ilə Fondun elektron sisteminə müraciət edə bilər.