[imageeffect type=”frame” align=”alignleft” width=”240″ height=”154″ alt=”” url=”http://youthfoundation.az/wp-content/uploads/2012/11/images.jpg” ]
20 noyabr – 2 dekabr 2012-ci il tarixlərində Azərbaycan Respublikasının Gənclər və İdman Nazirliyinin dəvəti ilə 4 Latın Amerikası ölkələri ilə gənclərlə iş sahəsində təcrübə mübadiləsi proqramı reallaşdırılır. Bu müddətdə Kolumbiya, Kosta-Rika, Meksika və Panamadan 43 nəfərdən ibarət nümayəndə heyəti Azərbaycanda səfərdədir. Səfər Azərbaycan Respublikasının Meksikadakı səfirliyinin təşəbbüsü ilə “Azərbaycan gəncliyi 2011-2015-ci illərdə” Dövlət Proqramı çərçivəsində həyata keçirilir.
Nümayəndə heyətinin Azərbaycana gəlişi ilə əlaqədar hazırlanmış səfər proqramı çərçivəsində iştirakçıların Fərxi Xiyabana və Şəhidlər Xiyabanına ziyarəti, bir sıra dövlət qurumları, o cümlədən, bir qrup gənc millət vəkilləri ilə görüşləri, Azərbaycan Respublikasının Prezidenti yanında Strateji Araşdırmalar Mərkəzi, Heydər Əliyev Fondu və Azərbaycan Diplomatiya Akademiyası ilə tanışlıq, gənclər təşkilatlarının iştirakı ilə dəyirmi masa və Azərbaycanın tarixini və mədəniyyətini geniş şəkildə əks etdirən bir neçə təqdimatda iştirakı nəzərdə tutulmuşdur. Səfər zamanı nümayəndə heyətinin Azərbaycanla ikitərəfli əlaqələrin qurulması və əməkdaşlıq perspektivlərinin müzakirəsi gözlənilir. Qeyd edək ki, bu, Latın Amerika ölkələri ilə gənclərlə iş sahəsində keçirilən ilk mübadilə proqramıdır.
22 noyabr saat 15:00-da, “JW Marriott Absheron” otelində nümayəndə heyətinin Azərbaycan Gənclər Fondu, Azərbaycan Respublikası Gənclər Təşkilatlarının Milli Şurası, “İRƏLİ” İctimai Birliyi və Azərbaycan Tələbə Gənclər Təşkilatları İttifaqı ilə görüşü keçiriləcək.
