Göygöl Milli Parkında “Təbiətin keşiyində” adlı eko-skaut düşərgəsi keçirilmişdir

96

6-8 fevral 2019-cu il tarixlərində Azərbaycan Respublikasının Gənclər Fondunun dəstəyi, IDEA İctimai Birliyi və Azərbaycan Skautlar Assosiasiyasının təşkilatçılığı ilə Göygöl Milli Parkında “Təbiətin keşiyində” adlı növbəti eko-skaut düşərgəsi təşkil edilmişdir.
“Təbiətin keşiyində” düşərgələrinin məqsədi gəncləri Azərbaycanın zəngin təbiəti, endem flora və faunası barədə məlumatlandırmaq, təbiəti qorumaq, onlara təbiətin bəxş etdiyi sərvətlərdən qənaətlə və düzgün istifadə etməyi, həmçinin gənclərə vəhşi təbiətdə düzgün davranışı, ətraf mühitə ziyan vermədən istirahəti təşviq etməkdir.
Düşərgəyə 18-25 yaşarası ekoloji təhsili və ya bu sahədə təcrübəsi olan, həmçinin ekoloji fəallığı ilə seçilən 150 nəfərə yaxın gənc qoşulmuşdur.
Könüllü olaraq qoşulmuş gənclərin iştirakı ilə Göygöl Milli Parkının ərazisində eko-tur təşkil edilmişdir. Gənclərə Göygöl Milli Parkının yaradılmasında əsas məqsəd, əraziyə xas olan və dünyaca məşhur meşə landşaftı, göl və onun ətrafında məskunlaşmış və adları Azərbaycan Respublikasının Qırmızı Kitabına daxil edilmiş fauna növləri, gölün ekosistemi haqqında geniş məlumat verilmişdir.
Gənclər üçün iki günlük düşərgə müddətində Azərbaycanın biomüxtəlifliyi və milli parkları mövzusunda təlim,  o cümlədən təbiətdə olarkən çadırların qurulması, ilkin tibbi yardım, çölçülük üçün lazımi ləvazimatlar və təhlükəsiz geyimlər haqda seminar və praktiki təlimlər keçirilmişdir. Daha sonra, itirakçılar üçün müxtəlif ekoloji yarışlar və müsabiqələr keçirilmiş, həmçinin gənclər qlobal ətraf mühit problemləri üzrə fikir mübadilələri, ətraf mühitlə bağlı oyunlar, o cümlədən musiqili əyləncəli proqramda və s. iştirak etmişlər.
Düşərgə zamanı iştirakçıların zəngin təbiəti və mənzərəsi ilə seçilən Göygöl və Maralgölə ekskursiya təşkil edilmişdir.
Düşərgənin sonunda iştirakçılara xatirə hədiyyələri və sertifikatlar təqdim edilmişdir.
Qeyd edək ki, IDEA İctimai Birliyinin “Eko-skaut” layihəsinə 2017-ci ilin mart ayında start verilmişdir. Layihənin məqsədi gəncləri təbiətin mühafizəsinə cəlb etmək, canlı aləmi dərindən öyrənməyə və qorumağa, eləcə də cəmiyyətdə faydalı ekoloji işlərlə məşğul olmağa sövq etməkdən ibarətdir. “Eko-skaut” layihəsi çərçivəsində ilk düşərgə isə ötən ilin may ayında Şirvan Milli Parkında, daha sonra Ağgöl Milli Parkında keçirilmişdir.
Ekoloji maarifləndirmə, insan fəaliyyəti nəticəsində təbiətə vurulan ziyanın azaldılması və tədricən aradan qaldırılması, təbiətə münasibətdə etik davranışın formalaşdırılmasına töhfə verməsi baxımından “Təbiətin keşiyində” eko-skaut düşərgələrinin ölkəmizin digər milli parklarında da keçirilməsi planlaşdırılır.