13-15 dekabr 2018-ci il tarixlərində Azərbaycan Respublikasının Gənclər Fondunun maliyyə dəstəyi və İsmayıllı İntellektual Oyunlar Klubunun təşkilatılığı ilə keçirilən “Nə? Harada? Nə zaman?” oyunu üzrə Regionlar Kubokunun seçim turları yekunlaşmışdır. “Nə? Harada? Nə zaman?” oyunu üzrə Regionlar Kubokununun keçirilməsində məqsəd gənclərin asudə vaxtlarının səmərəli təşkili, onların intellektual inkişafının təmin olunması, eləcə də intellektual oyunlar hərəkatına region gənclərinin cəlb edilməsinin reallaşdırılmasıdır. Keçirilən yekun seçim turları gənclərin böyük marağına səbəb olmuşdur. Layihə müddətində təşkil olunan seçim turları ardıcıl olaraq Qəbələ, İsmayıllı və Şamaxı şəhərlərində təşkil edilmişdir. Regionlarda keçirilən seçim turlarında 300-dən çox gəncin təmsil olunduğu 50-ə yaxın yeniyetmə və gənclərdən ibarət komandalar final mərhələsində mübarizə aparmaq üçün iştirak etmişdir. Seçim turlarında ən yaxşı nəticə göstərən komandalar 25 dekabr tarixində İsmayıllı rayonunda keçiriləcək final oyununa vəsiqə qazanmışlar. “Nə? Harada? Nə zaman?” oyunu üzrə Regionlar Kubokununun finalında seçim turlarından finala vəsiqə qazanmış regionlarla yanaşı digər ətraf regionlardan olan çox saylı komandalar da final mərhələsinə qatılacaqlar. Finalda müxtəlif regionların gənclərindən ibarət 20-dən artıq komanda kubok uğunda mübarizə aparacaqdır.