“Resurs” Gənclərin İnkişafı İctimai Birliyi tərəfindən Azərbaycan Respublikasının Prezidenti yanında Gənclər Fondunun maliyyə dəstəyi ilə “Aprel döyüşləri qəhrəmanlarının tanıdılması” layihəsinin icrası davam edir. Layihənin məqsədi 2016-cı ilin Aprel döyüşlərində ölkəmizin ərazi bütövlüyü uğrunda şücaət göstərmiş qəhrəmanlarımızın yetişməkdə olan gənc nəslə tanıdılması və onların həyatı, keçdiyi böyük və şərəfli döyüş yolları, göstərdiyi igidliklər haqqında ətraflı məlumatlar verməkdən ibarət olmuşdur.
Layihə çərçivəsində 2016-cı ilin aprel ayında Ermənistan-Azərbaycan qoşunlarının təmas xəttində baş vermiş döyüşlər zamanı qəhrəmanlıq göstərmiş Azərbaycan əsgər və zabitləri gənclərə tanıdılmışdır. Bakı şəhəri 286 nömrəli tam orta məktəbdə keçirilmiş tədbirlərdə yeniyetmə və gənclər fəal iştirak etdilər. Tədbirləri giriş sözü ilə açan “Resurs” Gənclərin İnkişafı İctimai Birliyinin sədri Samir Mehdi-zadə layihə haqqında iştirakçılara geniş məlumat verdi və Gənclər Fondunun rəhbərliyinə aktual layihəyə dəstək verdiklərinə görə minnətdarlığını bildirdi.
Tədbir Dövlət Himni ilə açıq elan edildi. Gənclər qarşısında çıxış edən məktəbin tarix müəllimləri Təranə Salahova və Alimə Məmmədova bildirdilər ki, “Aprel döyüşləri yenilməz, şanlı Azərbaycan ordusunun gücünü və qüvvəsini düşmənə bir daha göstərdi və sübut etdi ki, Azərbaycan xalqi ali baş komandan, prezident İlham Əliyev başda olmaqla heç vaxt işğalla barişmayacaq, nə yolla olursa olsun, biz torpaqlarimizi düşmən tapdağından azad edəcəyik!” Şagirdlər Aprel döyüşlərinin Qəhrəmanları haqqında iştirakçılara geniş məlumatlar verdilər, vətənpərvərlik mövzusunda şeirlər söylədilər. “Aprel döyüşlərində və digər döyüşlərdə şəhid olmuş oğullarimizin əziz xatirəsi hec vaxt unudulmayacaq!”.

İşğal altında olan torpaqlarımızın azad edilməsi məqsədilə cəmiyyət üzvlərinə vətənpərvərlik hisslərinin aşılanması, Milli Qəhrəmanların təbliğ edilərək tanıdılması, xalqımızın Ali Baş Komandanın əmrinə daim hazır olmaları üçün təbliğat işlərinin aparılması dövlət və hökumət orqanları ilə yanaşı, ictimai birliklərin də üzərinə böyük vəzifələr qoyur. Ən yeni tariximizin şanlı səhifəsi olan Aprel döyüşlərində iştirak etmiş, şəhid olmuş qəhramanların gənc nəslə tanıdılması bu baxımdan çox mühüm əhəmiyyət kəsb edir.

Layihə çərçivəsində keçiriləcək kütləvi tədbirlər zamanı Aprel döyüşlərində bilavasitə iştirak etmiş qəhrəmanlarımızla canlı ünsiyyət təşkil ediləcək, onlar haqqında çəkilmiş qısa filmlər nümayiş etdiriləcəkdir. Tədbirlərdə gənc nəslin nümayəndələrinin, o cümlədən dövlət orqanlarının məsul əməkdaşlarının, digər QHT və KİV nümayəndələrinin iştirakı təmin ediləcəkdir. Layihənin gedişatı haqqında mütəmadi olaraq mətbuat vasitəsilə ictimaiyyətə məlumat veriləcəkdir.