Azərbaycan Respublikasının Gənclər Fondunun, Gənclər və İdman Nazirliyinin dəstəyi, Azərbaycan Könüllü Təşkilatları İttifaqının təşkilatçılığı ilə Quba Olimpiya İdman Kompleksində “Könüllü baharı” Azərbaycan Könüllülərinin yaz düşərgəsi keçirilib.
Martın 14-dən 18-dək keçirilən düşərgədə müxtəlif könüllü təşkilatlarından 150 gənc iştirak edib. Düşərgənin məqsədi könüllülərin asudə vaxtlarının səmərəli təşkili ilə yanaşı, onlara mədəni irsimizin və zəngin tariximizin aşılanması, eyni zamanda, şəxsi inkişafın və sağlam həyat tərzinin təşviqindən ibarət olub.
Düşərgənin əvvəlində könüllülər tərəfindən Quba rayonunda yerləşən Ulu Öndərin abidəsi ziyarət edilib.
4 gün davam edən düşərgə müddətində iştirakçılar üçün tanışlıq oyunları təşkil edilib, könüllülərin asudə vaxtlarını səmərəli dəyərləndirmələri üçün xüsusi peşəkarlığı və təcrübəsi ilə seçilən təlimçilər tərəfindən təlimlər həyata keçirilib, komanda oyunları, intellektual oyunlar və vörkşoplar baş tutub.
Novruz bayramı ab-havalı düşərgədə tonqal ətrafında Novruz şousu da təşkil olunub. Düşərgə ilə bağlı təəssüratların paylaşılması üçün “Könüllünün bir günü” adlı videokontentlər hazırlanıb, eyni zamanda, gənclərin öz istedadlarını nümayiş etdirmələri üçün “İstedadSƏN!” yarışı keçirilib.
“Könüllü baharı” yaz düşərgəsi Azərbaycan könüllülərinin bilik və bacarıqlarını artırmaq, onların sosial aktivliyini yüksəltmək və şəbəkələşməsini gücləndirmək baxımından mühüm rol oynayıb.
