17 yanvar 2025-ci il tarixində Gənclər Təşkilatlarının Resurs Mərkəzində Azərbaycan Respublikasının Gənclər Fondu ilk dəfə elan etdiyi “Rəqəmsal” mövzulu qrant müsabiqəsinin qalibi olan gənclər təşkilatlarının nümayəndələri və gənclər ilə görüş keçirib.
Görüş zamanı Gənclər Fondunun icraçı direktoru vəzifəsini icra edən Qədir Xəlilov qalibləri təbrik edərək həyata keçiriləcək layihələrin gənclərin texnologiya sahəsində innovativ fikirlərinin üzə çıxarılması və rəqəmsal biliklərinin daha da artırılması istiqamətində böyük önəm daşıyacağını vurğulayıb. Həmçinin, qrant müsabiqəsinin Ekspert Komissiyasının üzvü olan Azərbaycan İnformasiya və Kommunikasiya Texnologiyaları Sənayesi Assosiasiyasının İdarə Heyətinin sədri Elvin Abbasov ölkəmizdə rəqəmsallaşmanın sürətlənməsinə dəstək olan bu kimi təşəbbüslərin əhəmiyyətindən danışıb.
Görüşdə qrant müsabiqəsi çərçivəsində qalib gənclər təşkilatları və fiziki şəxslər tərəfindən layihələrin icrası zamanı ayrılmış qrant vəsaitindən istifadənin səmərəliliyinin artırılması üçün rəqəmsallaşma üzrə ixtisaslaşmış müvafiq tərəfdaşların cəlb edilməsinin vacibliyindən bəhs edilib, Fond tərəfindən aidiyyəti üzrə dövlət-özəl əməkdaşlığı çərçivəsində tərəfdaşların cəlb olunmasında dəstək göstəriləcəyi bildirilib. Qalib layihələrin icra müddətində görülən işlərin əhatə dairəsinin genişləndirmək və məhsuldarlığını artırmaq məqsədilə Fond tərəfindən mütəmadi görüşlərin təşkil olunacağı da qeyd olunub.
Görüşün yekununda gənclər təşkilatlarının nümayəndələri və fiziki şəxslər üçün Fondun əməkdaşları tərəfindən qrant müqaviləsinin bağlanması, təsviri və maliyyə hesabatlarının verilmə qaydaları haqqında məlumat verilib, eyni zamanda qalibləri maraqlandıran suallar cavablandırılıb. Qeyd edək ki, müraciət qəbulu 18 oktyabr-1 dekabr 2024-cü il tarixlərində həyata keçirilmiş “Rəqəmsal” mövzulu qrant müsabiqəsinin əsas məqsədi gənc nəslin innovativ təşəbbüslərini dəstəkləmək, gənclərin yaradıcı potensialını aşkara çıxarmaq üçün onların internet məkanında yaradıcı rəqəmsal məzmunlar yaratmasını təşviq etmək olub.
Fondun Müşahidə Şurasının qərarına əsasən qrant müsabiqəsinin nəticəsi olaraq gənclər təşkilatlarının 17, gənclərin isə 55 layihəsi dəstəklənib.
