Azərbaycan Respublikasının Gənclər Fondunun, Naxçıvan Dövlət Universitetinin, Naxçıvan Müəllimlər İnstitutunun dəstəyi və Azərbaycan Tələbə Gənclər Təşkilatları İttifaqının (ATGTİ) təşkilatçılığı ilə Ümummilli Lider Heydər Əliyevin anadan olmasının 101-ci ildönümünə həsr olunmuş Naxçıvan Muxtar Respublikasında 400 tələbə və fəal gəncin iştirakı ilə “İpəkyolu Beynəlxalq Gənclər Forumu 2024” baş tutub.
Forumun rəsmi açılışından öncə Ulu Öndər Heydər Əliyevin Naxçıvan şəhərində yerləşən abidəsi ziyarət olunub, önünə tər gül dəstələri qoyulub. Naxçıvan Gənclik Mərkəzində keçirilən tədbirin rəsmi hissəsi Azərbaycan Respublikasının Dövlət Himninin səsləndirilməsi ilə öz işinə başlayıb. Daha sonra Ulu Öndərin və bütöv Azərbaycan uğrunda canından keçmiş qəhrəmanlarımızın əziz xatirəsi ehtiram və qürur hissi ilə yad edilib.
Forumda Gənclər Fondunun icraçı direktoru vəzifəsini icra edən Qədir Xəlilov, Xarici İşlər Nazirliyinin NMR-dakı İdarəsinin rəisi Vüsal Ələkbərli, NDU-nun Beynəlxalq əlaqələr üzrə prorektoru Aidə Cəlilzadə, NMİ-nin Tədris işləri üzrə prorektoru Elşən Məmmədov və ATGTİ-nin sədri Pərviz Mirələmli açılış nitqi ilə çıxış edərək Ulu Öndərin dövlət gənclər siyasətinin formalaşdırmasından, ölkə gənclərinə göstərdiyi diqqət və etimaddan, onlara etdiyi tövsiyələrdən bəhs edərək, forumun perspektivləri müzakirə edilib və tələbələrə uğurlar arzulayıblar.
Tədbirin rəsmi hissəsi yekunlaşdıqdan sonra NDU nəzdində Naxçıvan Musiqi Kollecinin tələbələrinin ifası dinlənilib.
Sonra rəsmilərin iştirakı ilə “Ümummilli Lider Heydər Əliyev İrsi – Gənclərin inkişafı və liderliyi” mövzusunda, NDU-də təhsil alan xarici tələbələrin iştirakı ilə isə “İpək Yolu Perspektivləri: Sabahın Çağırışları üçün Gənclərin Maarifləndirilməsi” mövzusunda panel görüşlər baş tutub.
Qeyd edək ki, forumun əsas məqsədi məhz Naxçıvanda təhsil alan yerli və xarici tələbələri bir araya toplayaraq gənclər siyasətində öz əksini tapan prioritet mövzular üzrə fikir mübadiləsini təmin etmək, yeni perspektivlər və çağırışlar haqqında məlumatlılığın artırılması mahiyyəti daşımışdır.
