20-24 may 2024-cü il tarixlərində Şəki Olimpiya İdman Kompleksində Azərbaycan Respublikası Gənclər və İdman Nazirliyi, Dövlət Məşğulluq Agentliyi və Azərbaycan Respublikasının Gənclər Fondunun dəstəyi, “Gənclərin Maarifləndirilməsinə Dəstək” İctimai Birliyinin təşkilatçılığı ilə karyera yolunda uğur əldə etmək istəyən gənclər üçün “Gənclərin Məşğulluq Məktəbi 2” Yaz Düşərgəsi həyata keçiriləcək.
Düşərgənin əsas məqsədi gənclərin məşğulluq imkanlarının artırılması üçün gənclər arasında şəbəkələşmə əlaqələrinin gücləndirilməsi və onların karyera planlaması istiqamətində maarifləndirilməsinə dəstək olmaqdır.
5 gün davam edəcək düşərgə zamanı gənc iştirakçılar üçün karyera planlamasında vacib addımlar, düzgün məqsədlərin təyin edilməsi, effektiv CV-nin yazılması, müsahibəyə hazırlıq qaydaları və s. mövzularda təlimlər, panel müzakirələr, müxtəlif peşələr üzrə master-klasslar, konsultasiya xidmətləri, əyləncəli enercayzerlər, komanda quruculuğu və intellektual oyunlar, idman yarışları keçiriləcək. Həmçinin, düşərgə müddətində gənclər Şəki şəhərinin zəngin mədəniyyət və tarixinə ekskursiya edəcəklər. Hər günün yekununda düşərgə iştirakçıları üçün konsert proqramı təşkil olunacaq.
Öyrənmək, əylənmək və unudulmaz xatirələr qazanmaq istəyən gənclər düşərgədə iştirak üçün https://bit.ly/genclerinmesgulluqmektebi linki vasitəsilə qeydiyyatdan keçə bilərlər. Qeydiyyat üçün son tarix 7 may 2024-cü ildir. Seçimlər zamanı 18-29 yaş arası, sonuncu kurs tələbələri, məzun olmuş və ya işaxtaran gənclərə üstünlük veriləcəkdir.
Xatırladaq ki, “Gənclərin Məşğulluq Məktəbi” ilk dəfə 6-10 fevral 2023-cü il tarixlərində qış düşərgəsi formatında Mingəçevir şəhərində 120 gəncin iştirakı ilə baş tutmuşdur.
