Azərbaycan Gənclər Fondunun dəstəyi, Mədəniyyət Nazirliyi və “RÄNG” leyblının tərəfdaşlığı, “GəncSİMA” İctimai Birliyinin təşkilatçılığı ilə keçirilən “Səhnədə” müsabiqəsinin qalibləri elan olunub.
Müsabiqənin “Mədəniyyət” telekanalı ilə canlı yayımlanan final gecəsində Bakı, Gəncə, Naxçıvan, Şəki, Quba, Lənkəran və Yevlax şəhərlərində keçirilən canlı kastinqlərdən seçilmiş 10 iştirakçının səhnə ifaları təqdim edilib.
Sevda Ələkbərzadə, Pərviz İsaqov, İlhamə Qasımova, Aytən İsmixanova, Natəvan Həbibi, Muxtar Abseynov, Nərmin Kərimbəyovanın yer aldığı münsiflər heyətinin rəyi və müsabiqənin rəsmi saytı üzərindən səsvermələr nəticəsində Lalə Abdulrəhimli, Aminəxatun Şirməmmədova və Rüstəm İbrahimov qalib elan olunub.
Final konsertinin sonunda gənc ifaçıların iştirakı ilə Ali Baş Komandan İlham Əliyevin rəhbərliyi ilə qazanılan şanlı Zəfərimizə ithaf olunan “Ey Azərbaycanım!” mahnısı səsləndirilib.
Qeyd edək ki, bu ilin əvvəlində elan olunan müsabiqənin əsas məqsədi Azərbaycanın ifaçılıq istedadı olan gənclərini kəşf edərək onların qabiliyyətlərinin inkişafı və sənətdə öz yerini tapmasına dəstək olmaq, vətənpərvərlik mövzusunda mahnıların gənc ifaçılar tərəfindən ifa edilməsi və gənclər arasında təbliği idi.
Xatırladaq ki, qalib ifaçılarla “RÄNG” leyblı arasında birillik prodüserlik müqaviləsi imzalanacaq.
