Dekabrın 4-də Bakı Konqres Mərkəzində “Azərbaycan Könüllülük Həftəsi 2025”in başlanması ilə əlaqədar olaraq mətbuat konfransı keçirilib. Mətbuat konfransında Azərbaycan Respublikasının Gənclər Fondunun İnformasiya Texnologiyaları və İctimaiyyətlə Əlaqələr şöbəsinin müdiri Pərvanə Cəlallı ölkəmizdə könüllülüyün gənclər arasında həyat tərzinə çevrildiyini və “Könüllülük Həftəsi”nin könüllülərin fəaliyyətinin inkişafına mühüm töhfə verdiyini vurğulayıb. Daha sonra çıxış edən Azərbaycan Könüllü Təşkilatları İttifaqının sədri Vüqar Əliyev bildirib ki, “Könüllülük Həftəsi” ölkədə könüllülük hərəkatının daha da genişlənməsi, gənclərin ictimai proseslərdə fəal iştirakının təşviq edilməsi və dövlət qurumları ilə ictimaiyyət arasında əməkdaşlığın gücləndirilməsi baxımından mühüm əhəmiyyət daşıyır. Həmçinin, həftənin 5 Dekabr – Beynəlxalq Könüllülər Günü ərəfəsində keçirilməsi bu günün ölkəmizdə daha geniş şəkildə qeyd edilməsi istiqamətində atılan mühüm addımlardan biridir. Qeyd olunub ki, həftə çərçivəsində ölkənin bir çox şəhər və rayonlarında 20 mindən çox Azərbaycan Könüllüsü üçün müxtəlif sosial layihələr, maarifləndirici tədbirlər və kütləvi könüllülük fəaliyyətləri həyata keçiriləcək. Daha sonra Gənclər və İdman Nazirliyinin nümayəndəsi Ülviyyə Axundova, “ASAN Xidmət”in nümayəndəsi Böyükxanım Babayeva “Könüllülük Həftəsi” çərçivəsində keçiriləcək layihələrdə tərəfdaş qurumların dəstəyi barədə media nümayəndələrinə məlumat veriblər.

“Azərbaycan Könüllülük Həftəsi 2025” çərçivəsində baş tutacaq layihələr “Zəfər: 5 il”, “Konstitusiya-30 il”, “Milli birlik”, “AKTİ-5 il”, “Könüldən könüllü” və “Suveren Azərbaycan” mövzularına həsr olunacaq. Şanlı Zəfərimizin 5-ci ildönümünün qeyd olunduğu bu dövrdə keçirilən layihələr ölkəmizin dövlətçilik ənənələrinə sədaqətin, milli həmrəyliyin və vətənpərvərlik ruhunun daha geniş təbliğini məqsəd qoyur. Həftə ərzində təşkil olunacaq bütün tədbirlər könüllü gənclərin ictimai proseslərdə iştirakını artırmaqla yanaşı, onların dövlətçilik, suverenlik və milli dəyərlərə bağlılığının möhkəmləndirilməsinə xidmət edəcək.

Qeyd edək ki, 2018-ci ildən etibarən hər il 5 dekabr – Beynəlxalq Könüllülər Günü ərəfəsində keçirilən və artıq ənənəvi xarakter alan “Azərbaycan Könüllülük Həftəsi” Azərbaycan Respublikasının Gənclər Fondu və tərəfdaş qurumların birgə dəstəyi ilə həyata keçirilir. Bu çərçivədə təşkil olunan tədbirlər könüllülərə təkcə şəxsi inkişaf imkanları qazandırmır, eyni zamanda onların cəmiyyətdə müsbət dəyişikliklərin aparıcı qüvvəsi kimi mövqeyini daha da gücləndirir.

“Azərbaycan Könüllülük Həftəsi 2025” çərçivəsində baş tutacaq bütün fəaliyyətlərlə bağlı Azərbaycan Könüllü Təşkilatları İttifaqının sosial media hesabları vasitəsilə daha ətraflı məlumat əldə etmək mümkündür.

Gənclər Məkanının yaradılmasında məqsəd gənclərin asudə vaxtlarını səmərəli və yaradıcı şəkildə keçirmələrinə şərait yaratmaqdır. Məkan gənclərin sosial inkişafını dəstəkləyərək, onların şəxsi və peşəkar bacarıqlarını inkişaf etdirməyi hədəfləyir. Yevlax Gənclər Məkanı gənclərə təkcə iştirakçı olmaq imkanı deyil, həm də öz fəaliyyətlərini təşkil etmək üçün geniş imkanlar yaradacaq. Burada gənclər öz maraqlarına uyğun layihələr, tədbirlər, klub və yarışlar təşkil edə, liderlik və təşkilatçılıq bacarıqlarını inkişaf etdirə bilərlər.

Açılış mərasimində iştirak edən Azərbaycan Respublikasının Gənclər Fondunun icraçı direktoru vəzifəsini icra edən Qədir Xəlilov, Yevlax rayon İcra Hakimiyyətinin başçısnın müavini Elnarə Əzizova və digər rəsmilər, Gənclərin İnkişaf və Karyera Mərkəzinin baş ofisinin nümayəndələri, GİKM-in Mərkəzi Aran regional nümayəndəliyinin əməkdaşları əvvəlcə Yevlax şəhərinin mərkəzində Ulu Öndər Heydər Əliyevin abidəsini ziyarət edərək, önünə gül dəstələri düzüblər.

Açılışda çıxış edən rəsmilər gənclərin inkişafı üçün bu cür məkanların əhəmiyyətini vurğulayaraq, gələcəkdə burada keçiriləcək layihələrin gənclərin həyatına müsbət təsir edəcəyini qeyd ediblər.

Rəsmi hissə yekunlaşdıqdan sonra qonaqlar və gənclər məkanın müasir şəraiti ilə tanış olublar. Açılış mərasimi musiqili-əyləncəli proqramla yekunlaşıb.

Yevlax Gənclər Məkanı bundan sonra gənclərin yeni layihə və təşəbbüsləri üçün geniş imkanlar təqdim edərək, onlara dəstək olmağa davam edəcək.

Çadır tipli düşərgə formatında olan festival Azərbaycan Respublikasının Gənclər Fondunun dəstəyi, “İDEA” İctimai Birliyi, COP29 Sədrliyi, Azərbaycan Tələbə Gənclər Təşkilatları İttifaqı, Azərbaycan Könüllü Təşkilatları İttifaqı, “CAVAN” Gənclər Hərəkatı İctimai Birliyi və “Gənc Könüllülər” İctimai Birliyinin birgə təşkilatçılığı ilə Şamaxıda keçirilib.

Xüsusi vurğulayaq ki, Prezident İlham Əliyevin Sərəncamına əsasən Azərbaycan Respublikasında 2024-cü ilin “Yaşıl dünya naminə həmrəylik ili” elan olunmasının və COP29 kimi mötəbər tədbirə ölkəmizin ev sahibliyi etməsinin vacibliyini nəzərə alaraq, bu ilki düşərgədə seçilən mövzular ekologiya, ətraf mühitin mühafizəsi və COP29-a həsr olunub.

“Birlikdə daha yaşıl gələcəyə!” devizi ilə keçirilən “Yay Fest”-in başlıca məqsədi dövlət gənclər siyasətinə uyğun olaraq gənclər üçün müxtəlif sahələrdə yaradılan geniş imkanların təşviqinə, gənclərin inkişafı və onların asudə vaxtının səmərəli və əyləncəli keçirməsinə, o cümlədən müxtəlif bölgələrdən olan gənclərin şəbəkələşməsinə və sosiallaşmasına dəstək vermək olub.

İyulun 15-dən etibarən başlayan “Yay Fest”-in hər düşərgəsi  gənclər üçün unudulmaz, əyləncəli, yadda qalan və öyrədici olub. Təbiət qoynunda təşkil olunan ekoloji oyunlar, komanda işləri, haykinq və əyləncəli fəaliyyətlər gənclərə həm maraqlı, həm də öyrədici təcrübə yaşadıb. Həmçinin, düşərgə iştirakçıları müxtəlif bölgələrdən olan yaşıdları ilə tanış olub, yeni dostluqlar quraraq şəbəkələşmənin və sosiallaşmanın vacibliyini bir daha anlayıblar. Gənclər üçün hazırlanmış maraqlı və dinamik proqram, onların həm asudə vaxtını səmərəli keçirməsinə, həm də şəxsi və peşəkar inkişafına töhfə verib. Düşərgə çərçivəsində “IDEA” İctimai Birliyi tərəfindən keçirilən təlimlər və interaktiv fəaliyyətlər gənclərin ekoloji maariflənməsini artırmaqla yanaşı, onların ekoloji məsələlərə məsuliyyətli yanaşmasını təşviq edib.

Azərbaycan Respublikası Prezidentinin Laçın Rayonunda Xüsusi Nümayəndəliyinin, Gənclər və İdman Nazirliyinin və Gənclər Fondunun dəstəyi ilə “Böyük Qayıdış” Gənclər Təşkilatı tərəfindən formalaşdırılan “Qayıdış Könüllüləri” Proqramının “Laçın Könüllüləri” qrupu ilk dəfə olaraq ərazidə fəaliyyətə başlayıb.

Prezident İlham Əliyevin işğaldan azad edilmiş ərazilərimizdə aparılan işlərə gənc nəslin, xüsusilə də kökləri bu torpaqlara bağlı olan gənclərin daha geniş cəlb edilməsi çağırışına uyğun olaraq həyata keçirilən “Qayıdış Könüllüləri” proqramının əsas məqsədi azad olunmuş ərazilərdə könüllülük fəaliyyətini dəstəkləmək, əslən oradan olan gənclərin doğma torpaqlarında yenidənqurma və bərpa işlərində, eləcə də bölgənin zəngin tarixi-mədəni irsinin təbliğində iştirakını təşviq etmək və Böyük Qayıdış prosesinə töhfə verməkdir.

Laçın könüllülərinin şəhərə təşkil olunan səfəri zamanı Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov könüllülərlə görüşərək şəhərdə aparılan bərpa və quruculuq işləri haqqında, həyata keçirilən və gələcəkdə keçirilməsi planlaşdırılan layihələr haqqında geniş məlumat verib, könüllülərin səfər təəssüratlarını dinləyib, onlara bu nəcib işdə, gələcək fəaliyyətlərində uğurlar arzulayıb. Həmçinin görüşdə tərəfdaş qurumların nümayəndələri könüllülərə işğaldan azad olunmuş ərazilərdə, eləcə də Laçın rayonunda könüllü fəaliyyətinin təşkili və onların iştirakı ilə həyata keçiriləcək fəaliyyətlər haqqında ətraflı məlumat veriblər. Bildirilib ki, Laçın könüllülərinin belə səfərlərinin tez-tez təşkili, eyni zamanda, Nümayəndəliklə birlikdə Laçın rayonunda müxtəlif məzmunlu, maraqlı tədbirlərin keçirilməsi nəzərdə tutulub.

Ekskursiya zamanı könüllülər işğaldan azad olunmuş, həyatın yenidən canlandığı, gündən – günə abadlaşan Laçın şəhərinin ərazisi ilə, buraya köçürülən ailələr üçün yaradılan şəraitlə yaxından tanış olub, şəhərdə aparılan bərpa və yenidənqurma işləri haqqında ətraflı məlumat əldə ediblər. Həmçinin könüllülər şəhərdə fəaliyyət göstərən “Hoçazfilm” yaradıcılıq studiyasının çəkiliş pavilyonunda və “Gilabi Ceramics” Yaradıcılıq Mərkəzində olublar.

Qeyd edək ki, könüllülər növbəti mərhələlərdə Laçın rayonunda fəaliyyət göstərəcək, o cümlədən tədbirlərin təşkilində yaxından iştirak edəcəklər. Eləcə də bölgəyə səfər edən yerli və xarici qonaqlarla işləyəcək, bərpa və yenidənqurma işlərinə, qayıdışa hazırlıq və məskunlaşmaya könüllü dəstəyin göstərilməsinə cəlb olunacaqlar.

“Yay Fest”-in keçirilməsində məqsəd dövlət gənclər siyasətinə uyğun olaraq gənclər üçün müxtəlif sahələrdə yaradılan geniş imkanların təşviqinə, gənclərin inkişafı və onların asudə vaxtının səmərəli və əyləncəli keçirməsinə, o cümlədən müxtəlif bölgələrdən olan gənclərin şəbəkələşməsinə və sosiallaşmasına dəstək verməkdir.

Minlərlə gəncin iştirak edəcəyi “Yay Fest”, gənclər üçün enerjili və dinamik bir mühit yaratmaq üçün geniş əyləncə və öyrənmə imkanları ilə zəngindir. 2019-cu ildən bəri təşkil olunan festival, 2 ay boyunca davam edəcək və müxtəlif mövzuları əhatə edən silsilə düşərgələrdən ibarət olacaq. Ötən illərdə olduğu kimi bu il də tematik mövzulara uyğun 8 ardıcıl düşərgənin keçirilməsi planlaşdırılır. Bu festivalda ümumilikdə 2000-dən çox gəncin iştirakı nəzərdə tutulub və düşərgə iştirakçıları üçün bütün zəruri şərait təşkilatçılar tərəfindən yaradılıb.

Qeyd edək ki, iyunun 15-də “Yaşıl dünya naminə həmrəylik ili” çərçivəsində “Birlikdə daha yaşıl gələcəyə!” şüarı altında keçirilən “Yay Fest”-in builki ilk düşərgəsinə start verilib. Düşərgə iştirakçıları ilk öncə ümummilli lider Heydər Əliyevin Şamaxı rayonunda ucaldılan abidəsini ziyarət edib, önünə gül dəstələri qoyublar. Düşərgənin açılış mərasimi Azərbaycan Respublikasının Dövlət Himninin səsləndirilməsi ilə başlayıb. Azərbaycanın suverenliyi, müstəqilliyi, ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.

Düşərgənin rəsmi açılış mərasimində dövlət rəsmiləri, gənclər təşkilatlarının rəhbərləri və media nümayəndələri iştirak edib. Çıxış edən natiqlər Prezident İlham Əliyevin Sərəncamına əsasən Azərbaycan Respublikasında 2024-cü il “Yaşıl dünya naminə həmrəylik ili” elan olunmasının və COP29 kimi mötəbər tədbirə ölkəmizin ev sahibliyi etməsinin vacibliyindən söz açıblar. Əlavə olaraq, çıxışçılar bu ilki düşərgədə seçilən mövzuların ekologiya, ətraf-mühitin mühafizəsi və COP29-a həsr olunmasının əhəmiyyətindən, ekoloji problemlərin həllində gənclərin iştirakçılığının artırılmasından bəhs ediblər. Qeyd olunub ki, builki düşərgə çərçivəsində yer alacaq COP həftəsi ərzində COP29 Azərbaycan Əməliyyat Şirkətinin ekspertləri tərəfindən dayanıqlılıq, ətraf mühitin mühafizəsi, iqlim dəyişmələrinin təsirlərinin azaldılması kimi müxtəlif mövzularda intensiv təlimlər təşkil olunacaq.

Qeyd edək ki, bir həftə davam edəcək silsilə düşərgələr, bu il daha geniş miqyasda və daha zəngin proqramlarla təşkil olunacaq. Düşərgənin proqramında gənclərin vətənpərvər ruhda tərbiyə olunması və onların inkişafına dəstək verən fəaliyyətlər xüsusi önəm daşıyacaq.

Xüsusi vurğulayaq ki, düşərgədə müzəffər Ali Baş Komandan İlham Əliyevin rəhbərliyi altında Vətən Müharibəsində qazanılmış Zəfərə və Azərbaycan dövlətçilik tarixinə həsr olunmuş sessiyalar təşkil ediləcək. Həmçinin açıq havada gənclərin fərdi və peşəkar inkişafını təmin edilməsi və asudə vaxtlarını səmərəli keçirmələri üçün müxtəlif mövzular üzrə mütəxəssislərin iştirakı ilə panel müzakirələr, peşəkar təlimlər, idman yarışları, hayking, əyləncəli və intellektual oyunlar keçiriləcək. Gənclər üçün qeyri-formal öyrənmənin vacibliyini nəzərə alaraq, düşərgə iştirakçıları üçün ekoloji məsuliyyətliyi artıran master-klasslar, vörkşoplar və görüşlər təşkil ediləcəkdir.

“Yay Fest”-in bütün yeniliklərindən xəbərdar olmaq, maraqlı və dinamik proqramlarla zəngin olan bu möhtəşəm tədbirdə iştirak şansı əldə etmək üçün “Yay Fest”-in instagram (www.instagram.com/yayfest.az/) səhifəsini izləyin. Festivalın unudulmaz anlarını yaşamaq və növbəti düşərgələrin bir parçası olmaq üçün bizə qoşulun və əyləncəli yay təcrübəsindən yararlanın!

Pendik gənclik düşərgəsində təşkil edilən bağlanış mərasimində Azərbaycan Respublikasının Gənclər Fondunun icraçı direktoru vəzifəsini icra edən Qədir Xəlilov və Pendik bələdiyyə rəhbərinin müavini Atakan Yüce çıxış edərək, ölkə başçıları cənab İlham Əliyevin və cənab Rəcəp Tayyip Ərdoğanın həyata keçirdiyi siyasət xəttə uyğun olaraq hər iki ölkə arasında qurulan sıx əlaqələrin gənclər sahəsinə də öz müsbət töhfəsini verdiyini və bu səbəbdən günü-gündən gənclərimiz arasında dostluq və qardaşlıq münasibətlərinin artırılması istiqamətində həyata keçirilən layihələrin sayının artdığını xüsusi vurğulamışlar.

İstanbulun Pendik əyalətində təşkil edilən düşərgədə xüsusi fəallığı ilə seçilərək səfər edən 30 gənc düşərgə müddətində hər iki ölkənin tarixini, milli-mənəvi dəyərlərini aşılayan müxtəlif tematik təlimlərdə, İstanbulda yerləşən tarixi-mədəni abidələrin ziyarətində iştirak edərək, türk gənclərlə yaxın dostluq və qardaşlıq əlaqələri qurmağa müvəffəq olmuşlar .

Qeyd edək ki, Pendik əyalətində təşkil edilən düşərgə Azərbaycan Respublikasının Gənclər Fondunun Türkiyədə həyata keçirdiyi növbəti beynəlxalq düşərgədir. Gələcək fəaliyyətlərdə hər iki ölkə gəncləri arasında şəbəkələşməni və qardaşlıq əlaqələrini daha da artırmaq məqsədi ilə türkiyəli gənclərin də ölkəmizə səfəri nəzərdə tutulmuşdur

Ölkəmizdə 2024-cü ilin “Yaşıl dünya naminə həmrəylik ili” elan olunmasına əsasən, bu il Səyyar Gənclər Xidməti gənclərin ekoloji məlumatlılığını, həmçinin ətraf mühitin qorunması sahəsində bilik və fəallıqlarını artırmağa yönəlib.

Dövlət gənclər siyasətinin gənclər üçün yaratdığı xidmət və proqramların ucqar kəndlərdə yaşayan gənclərin də əlçatanlığının artırılması, gənclər siyasəti ilə bağlı maarifləndirmə, eləcə də gənclərin sosial aktivliyinin dəstəklənməsi, asudə vaxtlarının səmərəli təşkili, və onların bilik, bacarıq və dünyagörüşünün genişləndirilməsinə yönəlmiş tədbirlər təşkil etmək məqsədi daşıyan layihə ilk olaraq Ağdaş rayonunda həyata keçirilib.

6-10 iyul 2024-cü il tarixləri aralığında Ağdaşın Qəsil kəndində baş tutacaq layihənin açılış mərasimi Azərbaycan Respublikasının Dövlət Himninin səsləndirilməsi ilə başlanıb və Azərbaycanın suverenliyi, müstəqilliyi, ərazi bütövlüyü uğrunda canından keçən şəhidlərimizin əziz xatirəsi 1 dəqiqəlik sükutla yad edilib.

Açılış mərasimində ilk olaraq söz Azərbaycan Respublikasının Gənclər Fondunun icraçı direktoru vəzifəsini icra edən Qədir Xəlilova söz verilib. Daha sonra Ağdaş rayon İcra Hakimiyyətinin ictimai-siyasi məsələlər üzrə müavini Aynur Novruzova rəsmiləri və gəncləri salamlayıb. Rəsmi hissə istedadlı gənclərin musiqili çıxışları ilə yekunlaşıb.

Gənclərin ekologiya (COP29), vətənpərvərlik, sahibkarlıq, karyera və rəqəmsal alətlərdən effektiv istifadə mövzularında peşəkar şəxslərlə, eləcə də bir sıra tərəfdaş qurumların nümayəndələri ilə görüşləri təşkil edilib. Daha sonra gənclər üçün “Gənclər siyasəti və dövlətçilik”, “Zərərli vərdişlərə yox deyək”, “Peşə seçimi və karyera” və “Sağlam və təhlükəsiz həyat” mövzularında təlim sessiyaları keçirilib.

Səyyar Gənclər Xidməti çərçivəsində kənd gəncləri üçün müxtəlif sahələr – robototexnika, rəsm çəkmə, 3D printer və qələm, tətbiqi şəbəkə sənəti üzrə master-klaslar həyata keçirilib.

Qeyd edilənlərə əlavə olaraq, tədbir ərazisində STEAM formatlı innovativ sərgi, gənclərin “Yaşıl dünya naminə həmrəylik ili”nə həsr edilmiş süni intellekt alətləri ilə yaratdıqları təsvirlər və rəsm əsərləri, virtual eynəklə virtual səyahət, gənclər üçün şəxsi anketin (CV) yaradılması xidməti yer alıb.

Bunlarla yanaşı, layihədə nəzərdə tutulmuş yarış və oyun proqramları çərçivəsində gənclər arasında vətənpərvərlik mövzusunda “Xəmsə” intellektual oyunu, Azərbaycan xəritəsinin pazl lövhə üzərində qurulması yarışı, stolüstü futbol və labirint yarışı, darts oyun çempionatı, çölçü oyun yarışı, “Jenga” oyunu, kəndir dartma yarışı baş tutub. Yarışlarda fəallıqları ilə seçilən gənclər mükafatlandırılıb.

Azərbaycan Respublikasının Gənclər Fondu, Gənclərin İnkişaf və Karyera Mərkəzi və “Gənc Könüllülər” tərəfindən həyata keçirilən “Səyyar Gənclər Xidməti” layihəsinin bu il oktyabr ayınadək hər birində 5 gün olmaqla, 10 şəhər və rayonda ucqar kənd gənclərinə xidmət göstərməsi nəzərdə tutulur.

Bu haqda bu gün Bakı Konqres Mərkəzində keçirilən mətbuat konfransında Gənclər və İdman nazirinin müavini İndira Hacıyeva, Gənclər Fondunun icraçı direktor vəzifəsini icra edən Qədir Xəlilov, Laçın rayonunda Azərbaycan Respublikası Prezidentinin Xüsusi Nümayəndəliyinin məsləhətçisi Albina Abduraxmanova və “Böyük Qayıdış” Gənclər Təşkilatının sədri Nail Şükürov məlumat verib.

Bildirilib ki, Müzəffər Ali Baş Komandan İlham Əliyevin işğaldan azad olunmuş ərazilərimizdə həyata keçirilən işlərə gənc nəslin, xüsusilə də kökləri bu torpaqlara bağlı olan gənclərin daha geniş cəlb olunması çağırışına uyğun olaraq formalaşdırılan “Qayıdış Könüllüləri” Proqramının əsas məqsədi, işğaldan azad olunmuş ərazilərdə könüllülük fəaliyyətini dəstəkləmək, əslən həmin bölgələrdən olan gənclərin öz doğma torpaqlarında yenidənqurma və bərpa işlərində, eləcə də bölgənin zəngin tarixi-mədəni irsinin təbliğində iştirakını təşviq etmək və Böyük Qayıdış prosesinə töhfə verməkdir.

Proqrama qoşulmaq istəyən, 18-29 yaş arası, əslən Laçın rayonundan olan hər bir gənc təhsil səviyyəsindən asılı olmayaraq “qayidish.konullu.az” saytında qeydiyyatdan keçə bilər. Qeydiyyat 15 iyul 2024-cü il tarixinə kimi davam edəcək.

Müraciəti müsbət dəyərləndirilmiş gənclər ardıcıl olaraq müsahibə, baza təlimləndirmə kursu və imtahan mərhələsindən keçəcəklər. Seçilmiş gənclər müvafiq təlim və hazırlıq keçdikdən sonra Laçın rayonu ərazisində müxtəlif könüllü fəaliyyətləri göstərəcək, o cümlədən tədbirlərin təşkilində iştirak edəcək, bölgəyə səfər edən yerli və xarici qonaqlarla işləyəcək, bərpa və yenidənqurma işlərinə dəstək verəcək, qayıdışa hazırlıq və məskunlaşmaya könüllü dəstəyinin göstərilməsinə cəlb olunacaqlar.

Könüllülərin hazırlanması üçün baza təlimləri peşəkar təlimçilər tərəfindən “Könüllülük fəaliyyətinin əsasları”, “Könüllü xidmətin təşkili”, “Gənclərin ideoloji hazırlığı”, “Yumşaq bacarıqlar”, “Psixoloji inkişaf”, “Liderlik və natiqlik bacarıqları” və “Minalardan qorunma qaydaları” mövzularında həyata keçiriləcəkdir. Təlimlərin keçirilməsində məqsəd gənclərin könüllülüyün prinsip və dəyərləri, könüllülük kodeksi, vətəndaşlar və xarici qonaqlarla ünsiyyət qaydaları, tapşırıqların yerinə yetirilməsi və subordinasiya, peşəkar fəaliyyətlərdə emosiaların idarəolunması, situasiyalardan çıxış yolları, effektiv ünsiyyət, Azərbaycan Gənclər siyasətinin priorotetləri, həmçinin təhlükəsizlik qaydaları haqqında bilik və bacarıqlarının artırılmasıdır.

Qeyd edək ki, hazırda “Qayıdış Könüllüləri” Proqramı çərçivəsində “Şuşa Könüllüləri”, “Ağdam Könüllüləri”, “Zəngilan Könüllüləri” və “Füzuli Könüllüləri” qrupları fəaliyyət göstərir. Könüllülər müvafiq ərazilərdə müxtəlif könüllü fəaliyyətlərinə cəlb olunur və aktiv iştirak edirlər.

Azərbaycan Respublikasının Gənclər Fondunun, Türkiyə Gənclər Fondunun və  İslam Əməkdaşlıq  Gənclər Forumu Avrasiya Regional Mərkəzinin birgə təşkilatçılığı ilə elan edilən “Yaşıl dünya üçün” adlı  beynəlxalq rəsm müsabiqəsinin qalibləri 7 iyun tarixində Gənclər Təşkilatlarının Resurs Mərkəzində təşkil edilən tədbirdə elan edilib.

Cari ilin 1 mart-1 may tarixləri aralığında keçirilən müsabiqənin əsas məqsədi milli, regional və qlobal səviyyədə ətraf mühitin qorunmasına, iqlim dəyişikliyinin qarşısının alınmasına diqqət çəkmək və proseslərə gənclərin daha fəal cəlb edilməsini təşviq edərək azərbaycanlı, türkiyəli və əcnəbi dünya müsəlman gənclərinin gözü ilə məsələyə yaradıcı üslubda yanaşmaqdan ibarətdir.

Tədbirdə iştirak edən Gənclər Fondunun icraçı direktor vəzifəsini icra edən Qədir Xəlilov, Türkiyə Respublikasının ölkəmizdəki səfirliyinin nümayəndəsi (dəqiqləşdirilir), İslam Əməkdaşlıq  Gənclər Forumu Avrasiya Regional Mərkəzinin baş direktoru Rafiq İsmayılov, Azərbaycan İnformasiya və Kommunikasiya Texnologiyaları Sənayesi Assosiasiyasının idarə heyətinin sədri Elvin Abbasov və Azərbaycan Dövlət Rəssamlıq Akademiyasının dosentləri Bəxtiyar Yusufov, Sabir Qasımov və Ramil Əliyev öz çıxışlarında İqlim dəyişikliyinə qarşı qlobal mübarizədə beynəlxalq həmrəyliyin gücləndirilməsi məqsədilə dövlət başçısı cənab İlham Əliyevin sərəncamı ilə  2024-cü ilin “Yaşıl dünya naminə həmrəylik ili” elan edilməsinin ölkəmiz üçün əhəmiyyətindən, dünyanın ekosisteminin qorunması istiqamətində gənclərin atacaqları addımların önəmindən və  ən əsası isə birgə mübarizə ilə yaşıl gələcəyin qorunmasına xüsusi vurğu etmişlər.

Müsabiqə 2 kateqoriya üzrə – ənənəvi rəsm texnikalarından istifadə ilə hazırlanmış rəsm əsərləri və süni intellekt həlləri ilə hazırlanmış təsvirlər üzrə təşkil edilmiş və daxil olan müraciətlər peşəkar münsif heyətinin iştirakı ilə qiymətləndirilərək qaliblər müəyyən edilmişdir. 1-ci yerin qalibi Samux rayonundan Fatimə Abusəlimova, 2-ci yerin qalibi Bakı şəhərindən Səbinə Həsənli, 3-cü yerin qalibi Bakı şəhərindən olan Kənan Abbasov  Türkiyəyə səfər haqqı, fərqlənən digər gənclər isə sertifikat və hədiyyələrlə mükafatlandırılmışlar.

TÜGVA ilə ortaq şəkildə həyata keçirilən müsabiqənin növbəti mərhələsi olaraq sıralarında türkiyəli müsabiqə qaliblərinin də yer aldığı heyət Azərbaycana səfər edəcək və rəsm müsabiqəsinin sərgisi təşkil ediləcəkdir.

Qeyd edək ki, Azərbaycan Respublikasının Gənclər Fondunun Türkiyə Gənclər Fondu ilə ortaq şəkildə həyata keçirdiyi ikinci rəsm müsabiqəsidir. Müsabiqələrdə ümumilikdə yüzlərlə azərbaycanlı və türkiyəli gənc iştirak etmiş və qaliblərin qarşılıqlı səfərləri baş tutmuşdur.

Bakı şəhərinin uşaq musiqi və incəsənət məktəbləri arasında yaradıcılıq və mədəni mübadilənin təşviqinə yönəlmiş, eyni zamanda şəhər sakinləri və qonaqların zövqünü oxşayan “Təbəssüm üçün musiqi” adlı silsilə tədbirlər həyata keçirilir.

Layihə Azərbaycan Respublikasının Mədəniyyət Nazirliyi, Bakı Şəhər İcra Hakimiyyətinin birgə təşkilatçılığı, Azərbaycan Gənclər Fondunun və “Mədəniyyət Könüllüləri” İctimai Birliyinin dəstəyi ilə reallaşdırılacaq.

Bu layihənin əsas məqsədi şəhərin müxtəlif məkanlarında (açıq havada) paytaxtın musiqi və incəsənət məktəbləri şagirdlərinin ifasında konsert proqramları təşkil etmək, gənc musiqiçi, rəssam və rəqqasların öz istedadlarını nümayiş etdirməkləri üçün şərait yaratmaq, eyni zamanda şəhərin mədəni mühitinə özünəməxsus rəng qatmaqdır.

2024-cü ilin may–iyun aylarını əhatə edəcək silsilə tədbirlərin açılış konserti 28 may tarixində saat 18:00-da Bakı şəhəri Fəvvarələr meydanında baş tutub. Ümumilikdə layihə çərçivəsində Bakı şəhərinin 20-dək musiqi və incəsənət məktəbinin şagirdlərinin iştirakı planlaşdırılır.

Qeyd edək ki, dünyanın bir çox paytaxt şəhərlərində ənənəvi olaraq şəhərin incəsənət kollektivləri açıq səhnə təqdimatları ilə özünəməxsus kolorit, fərqli ab-hava və baxımlı sənət nümunələri nümayiş etdirirlər. Bu da daha geniş ictimaiyyətlə canlı təmas və fərqli təqdimat üçün əlverişli imkan yaradır. Belə təcrübədən faydalanaraq Bakı şəhərinin musiqi və incəsənət məktəbləri, mədəniyyət könüllülərinin iştirakı ilə paytaxtımızın mədəni mühitinin zənginləşməsinə töhfə verəcək, habelə şəhər sakinləri və paytaxta təşrif buyurmuş qonaqların zövqünü oxşayacaq “Təbəssüm üçün musiqi” adlı layihəni həyata keçirir.