“Rəngli Arzular” rəsm sərgisinin açılış mərasimi təşkil edildi

45

5 yanvar 2018-ci il tarixində Azərbaycan Respublikasının Prezidenti yanında Gənclər Fondunun maliyyə dəstəyi ilə “Rəngli Arzular” rəsm sərgisinin açılış mərasimi təşkil edildi. Layihəyə gənc rəssamlar öz əl işləri ilə qatılmışdır. Layihə Azərbaycanın dilbər bölgəsi olan Gədəbəy rayonunda baş tutmuşdur. Açılış zamanı tədbir aparıcısı qonaqları və sərgi iştirakçılarını salamladı. Gənclər Fonduna öz təşəkkürlərini bildirdi. Şəmkir Rayon Mədəniyyət və Turizm idarəsinin rəis müavini Ramiz Məmmədov ona söz verilərkən tədbir iştirakçılarını salamladı və bu cür layihələrin faydasından geniş söz açdı, layihə rəhbərinə və gənc rəssamlara uğurlar arzuladı.
Daha sonra Gədəbəy rayon Təhsil şöbəsinin müdiri Baxış Nağıyev bu sərginin Gədəbəy rayonunda təşkil edilməsinin məktəblilərin rəsmə, mədəniyyətə və tarixə həvəs yaradacağı barədə geniş və ətraflı nitq söylədi.
Layihə rəhbəri Təhminə Musazadə layihənin məqsədindən geniş söz açdı, layihənin həyata keçirilməsində dəstək olan Azərbaycan Respublikasının Prezidenti Yanında Gənclər Fonduna təşəkkürünü bildirdi və layihədə iştirak edən, öz əsərləri ilə çıxış edən hər bir iştirakçıya uğurlar arzuladı.
Daha sonra isə rayon məktəbliləri və ziyalıları sərgiyə baxış keçirtdilər. Sərgi zamanı bələdçi və təlimçi sərgi ekskursiyasını apararaq sərgidəki əsərlər, əsərlərin mövzusu və sənət haqqında geniş məlumat verdi. Sərgidə iştirak edən hər kəs rəsm əsərləri ilə bağlı fikir bildirdi və öyrəndikləri məlumatlarlar ətrafında geniş müzakirələr aparıldı.