Noyabrın 10-u Masallı rayonunda, 14-ü isə Biləsuvar rayonunda “Üfüq” Gənclərin İnkişafı Naminə İctiami Birliyi Azərbaycan Respublikasının Prezidenti yanında Gənclər Fondu tərəfindən maliyyələşdirilən “Erkən nikahlara qarşı gənclərin sosial fəallığının artırılması” adlı layihə çərçivəsində tədbirlər həyata keçirib.
Layihənin rəhbəri, “Üfüq” Gənclərin İnkişafı Naminə İctiami Birliyinin sədri Nail Şükürov bildirmişdir ki, layihənin məqsədi regionlarda yaşayan gənclər arasında daha çox yayılan erkən nigah hallarının qarşısının alınması istiqamətində məlumatsızlığın aradan qaldırılması, insan hüquqlarının pozulması, zorakılıq halları, təhsildəki problemlərlə bağlı zərərin azaldılmasına tövhə vermək, dövlət və vətəndaş cəmiyyətinin səylərinin əlaqələndirilməsi, gənclərin hüquqlarının müdafiasi və ailə institutunun gücləndirilməsidir. Layihə rəhbəri ilə yanaşı, tədbirlərdə çıxış edən Rayon Gənclər və İdman İdarələrinin, yerli təşkilatların nümayəndələri qaldırılan problemin region üçün aktual olduğunu və bu layihənin iştirakçılar üçün faydalı təsiri olacağını xüsusi vurğuladılar.
Layihə çərçivəsində Biləsuvar və Masallı rayonunda “Erkən nikahlar və onların fəsadları” mövzusunda gənclərin, gənclər təşkilatları nümayəndələrinin, orta təhsil müəssisələrinin şagirdlərinin, müəllim və psixoloqlarının, valideynlərin iştirakı ilə təlimlər keçirilmişdir. Təlimlər layihənin eksperti, bu sahədə təcrübəli təlimçi Afiq Məlikov tərəfindən aparılmışdır.
Təlimlər aşağıdakı mövzuları əhatə etmişdir:
- Erkən nikah nədir, onların əhatə dairəsi və meydana gəlmə formaları;
- Erkən nikahların səbəbləri və motivləri;
- Erkən nikahların fəsadları: təhsil hüquqlarının pozulması, boşanmalar və sağlamlıq problemləri;
- “Elçilik” adlı tapşırığın yerinə yetirilməsi;
- Qrup işlərinin aparılması və praktiki işlər nəticəsində əldə ediləcək biliklərin möhkəmləndiriliməsi;
- Erkən nikahların qarşısının alınması yolları, təbliğat təşviqat işlərinin aparılması, və uğurlu mübarizənin aparılması üçün innovativ ideyaların söylənilməsi.
Bundan əlavə region gəncləri və əhali arasında erkən nikahın fəsadları mövzusunda zəruri təbliğat və maarifləndirmə işləri aprılmış, “erkən nikahın nəticələri” adlı vieoçarxlar nümayiş etdirilmiş, zəruri nəşr məhsulları əhali və gənclərə paylanmışdır.
Layihə çərçivəsində Biləsuvar və Massalı əhalisinin bir qrupunun iştirakı ilə erkən nikahlarla bağlı sosioloji sorğu aparılmışdır, bununla da mövcud vəziyyət öyrənilələrək, nəticələr təhlil edilmişdir.