13-14 noyabr tarixlərində Qazaxıstanın paytaxtı Astana şəhərində “Qazaxıstan Respublikasının İctimai Şuralarının I Respublika Məclisi” keçirilmişdir. Həmin tədbir çərçivəsində həmçinin “ARGO” Vətəndaş Cəmiyyətinin İnkişafı Assosiasiyasının təşkil etdiyi “Dövlət və vətəndaş cəmiyyəti təşkilatlarının birgə fəaliyyəti: Azərbaycanda və Mərkəzi Asiya ölkələrində təcrübə və perspektivlər” adlı beynəlxalq məsləhət görüşü keçirildi. Bu görüşdə Qazaxstandan əlavə, Tacikistan, Qırğızıstan və eləcə də, Azərbaycandan dövlət qurumları və QHT nümayəndələri iştirak edirdilər. Görüşün əsas məqsədi ölkənin iqtisadi, sosial, təhsil, gənclər və s. istiaqmətlərində dövlətlə vətəndaş cəmiyyəti təşkilatlarının birgə səmərəli fəaliyyəti, onların itimai şuralar və d. platfomalarda əməkdaşlığı, göstərilən müxtəlif xidmətlər və edilən dəstəklər haqqında fikir mübadiləsi aparmaq, gələcəkdə uğurlu təcrübələrin tətbiqini təşviq etmək idi.
Tədbirdə ölkəmizi Azərbaycan Respublikasının Prezidenti yanında Gənclər Fondunun aparat rəhbəri Faiq Qürbətov və “Savadlı Cəmiyyət” Müasir Təhsilə Dəstək İctimai Birliyinin sədri Fuad Dərgahlı təmsil etmişlər. F.Dərgahlı ölkəmizdə ümumən dövlət qurumlarının vətəndaş cəmiyyətinə göstərdiyi dəstək və qarşılıqlı əməkdaşlığı haqqında çıxış etmişdir. F.Qürbətov isə çıxışında Azərbaycan Gənclər Fondunun yaranma tarixi, fəaliyyəti, tədbirlər və maliyyə dəstəyi ilə həyata keçirilən layihələr haqqında geniş məlumat vermiş, bu qurumun prioritetlərini qeyd etmişdir. Daha sonra o tədbir iştirakçılarını maraqlandıran sualları cavablandırmışdır.
Görüşdə iştirak edən Qazaxıstanın hazırda yeganə qrant ayıran və cəmi 2 ildir fəaliyyət göstərən dövlət qurumu olan “Vətəndaş təşəbbüslərinə dəstək Mərkəzi” əməkdaşları dövlətin vətəndaş cəmiyyətləri təşkilatlarına dəstək vermək sahəsində Azərbaycanın uğurlu təcrübəsindən gələcəkdə yararlanmaq üçün ölkəmizin müfaviq qurumları ilə sıx əməkdaşlıq etməyin vacibliyini vurğuladılar. Digər qonaqlar da xüsus qeyd etdilər ki, ölkəmizdə bu sahədə aparılan işlər və nəticələr onu göstərir ki, bu fəaliyyəti uğurlu model kimi Mərkəzi Asiya ölkələrində tətbiq etmək olar.
